Hai unes selmanes abrióse’l plazu d’unes convocatories que pueden ser d’interés p’artistes de la música asturiana. Trátase de los Premios de la Música Independiente (MIN) y l’alcuentru de músiques de raigañu, Fira Mediterrània de Manresa. Güei 14 de xineru ye la fecha llende pa poder formalizar candidatures pa los Premios MIN y el 22 de xineru acaba’l plazu pa unviar propuestes artístiques que puedan ser representaes nel eventu catalán.
Los Premios MIN tán entamaos pola a Unión Fonográfica Independiente (UFI) y lleven faciéndose dende 2009. Los artistes que quieran participar pueden unviar les sos propuestes a una de les 23 categoríes esistentes -na que nun hai espaciu pa la música n’asturianu, anque sí pa la fecha notres llingües oficiales del Estáu español- a traviés de la web del certame. La gala de la XVIII edición de los Premios MIN va cebrase’l 25 de marzu nel Gran Teatru de Córdoba y na edición anterior superánronse 1.300 proyectos inscritos.
La Fira Mediterrània ye un eventu que dende hai 28 ediciones trabaya con propuestes de música, artes escéniques, de cai y cultura popular qu’usen el raigañu, la tradición y la cultura popular como motor creativu. El xueves 22 a les 24 hores remata’l plazu pa unviar candidatures a traviés de la web pa que la organización d’esti alcuentru les valores con vistes a programales ente los díes 15 y 18 d’ochobre, feches na que se va desenvolver la 29 edición. La convocatoria ta abierta a artistes n’asturianu y la selección va tener en cuenta criterios como la calidá artística, l’adecuación a los exes programáticos del eventu, el calter d’estrenu y la proyección del espectáculu.
Suscríbite a les nuestres novedaes
