La Fundación Municipal de Cultura de Xixón va entamar nel últimu trimestre d’esti añu’l programa Xixón Fem Music col envís de visibilizar la brecha de xéneru nel ámbitu de la música a nivel llocal, y desendolcar acciones p’ayudar a amenorgala. La iniciativa va presentase nun conciertu’l próximu sábadu 2 de payares a les 21h nel patiu del Centru de Cultura Antiguu Institutu, de baldre, cola participación de músiques profesionales y amateurs.
Una de les acciones va ser un semilleru de bandes, una apuesta pola formación de nuevos grupos constituyíos dafechu por muyeres, tutorizaos por dos profesionales consolidaes nel panorama musical asturianu: Mar Álvarez, de los grupos Pauline en la Playa, Petit Pop, Las Malvinas y Undershakers; y Sil Fernández, de Silvidos y Gemidos, Delagua, Los Commodoros, Hot Shot… En base a los niveles, aptitúes, gustos musicales y instrumentos de les solicitantes, la organización y les tutores llevarán a cabo un procesu de selección ente les interesaes pa la formación de dos bandes, facilitando los medios necesarios (llocal y equipu) pa entamar los ensayos. El plazu d’inscripción ta abiertu hasta’l próximu xueves 31 d’ochobre.
No tocante a los requisitos pa ser integrante del semilleru, les músiques interesaes han tener un nivel musical mínimu que-yos permita tocar en grupu de manera autónoma. El programa va acoyer a cantantes y instrumentistes de cualesquier instrumentu, mayores de 16 años y que nun trabayaren de manera profesional como músiques enantes. Amás, han de tener disponibilidá pa’asumir un ensayu selmanal, en día y horariu a consensuar nel grupu. La tutorización de los grupos va tener una duración mínima de seis meses dende l’entamu de los ensayos.
Suscríbite a les nuestres novedaes
