Ayeri martes 8 d’ochobre el salón d’actos de la Escuela de Comerciu de Xixón acoyó la presentación de Nel cantu la memoria. Ensayu sobre l’asturianada tradicional, la obra cola qu’Héctor Braga ganó’l XXIX Premiu Máximo Fuertes Acevedo d’Ensayu que concede’l gobiernu asturianu. Trátase d’un trabayu perinteresante que percuerre esti xéneru musical dende 1795 hasta 1966 y que va tar a la venta esti mes nes llibreríes y en musicasturiana.com. Sicasí, ayeri Braga enseñó les primeres copies dixitales de la obra y resumió unos conteníos qu’enllenen más de 300 páxines.
«Esti ye un trabayu de rebeldía contra lo que me tresmitieron, bien de profesores, en Conservatorios aú estudié, tanto n’Asturies como en Castilla y León. Ellí decíen que ser cultu yera sentir a Bach mientres torcíen el focicu cuando sentíen una asturianada. Y eso nun ye ser cultu; ye clasismu. L’asturianada ye la voz d’esti pueblu, asina que vamos mirar por ello». Con eses pallabres remató Héctor Braga la so charra; una intervención mui cercana con un marcáu calter didácticu na que tamién hubo una fonda crítica a los poderes académicos, mediáticos y políticos que «desprecien» un xéneru «qu’enllenaba places de toros y qu’agora yá nun xenera interés».
Una amuesa d’esa falta d’interés cola qu’ironizó l’autor foi que malpenes había una quincena de persones nel salón y, ente elles, nun s’alcontraba naide con venceyu a l’asturianada. Sicasí, toles asistentes salieron con un perbón sabor de boca nesti actu qu’abría l’Ochobre Lliterariu entamáu pola Oficina de Normalización Llingüística de Xixón. Nun ye pa menos, porque Braga faló d’una montonera cuestiones a lo llargo d’hora y cuartu: les característiques y oríxenes del xéneru; les diferencies ente los términos tonada, asturianada y canción asturiana; les obres científiques anteriores sobre esta cuestión; les lletres y l’usu del asturianu nelles; los concursos; la industria fonográfica; les grabaciones de campu; los acompañamientos instrumentales; los palos del xéneru; la trescripción en partitures; les figures clásiques… ente otres munches coses.
Les cuatro C
«Quixi intentar facer EL llibru en cuenta d’UN llibru», dixo l’autor pa ilustrar lo completo d’un ensayu científicu que resume y «traduz a un llinguaxe más divulgativu» les más de 600 fueyes que dieron forma a la tesis doctoral cola qu’Héctor Braga algamó un sobresaliente cum laude. D’esta manera, la obra organízase en cuatro bloques temáticos principales: «C de conocer, C de caltener, C de comunicar y C de concursar» na que fala de les cuestiones mentaes anteriormente y de munches más, porque l’ensayu repara hasta n’aspectos rellacionaos cola memoria histórica durante una dictadura que «reconoció a los cantadores afines» y «condergó al exiliu» a otros personaxes clave como El Polenchu o Eduardo Martínez Torner.
Amás d’esto, Nel cantu la memoria tamién tien un estensu apéndiz documental y apéndiz sonoru que recueye nun códigu QR 480 audios de discos comerciales y grabaciones de campu anteriores a 1966 -fecha na que les obres yá nun son de dominiu públicu y tán protexíos por derechos d’autor, polo tanto «yá nun son tradicionales», como desplicó l’autor-. Con esto, reflexa un llabor de «11 años guetando per archivos de dientro y fuera d’Asturies», porque en países como «Arxentina, Suiza o Méxicu» topó tamién información.
Futuru y andecha
«Como sigamos asina van referise a esto como las cancioncitas regionales del norte de Madrid. De la periferia», criticó Héctor Braga definiendo a l’asturianada como «un xeitu de cantar». «Cualesquier canción pue facese al xeitu de l’asturianada, poles sos particularidaes modales, pero non tol mundu pue cantar una asturianada porque ye mui díficil». Desplicó l’autor sorrayando la trescendencia d’un xéneru que «nun se enseña y nun se conoz», pero que tien tantos sieglos d’historia y ye tan importante «qu’hasta fai referencia a Asturies nel so nome».
La intervención d’esti doctor n’Historia del Arte y Musicoloxía nacíu en Llangréu en 1980 tamién tuvo una mirada al futuru. Braga afirmó qu’escribió’l llibru «pensando n’aquellos cantantes actuales abiertos al conocimientu de la ortodoxa del xéneru, pero sobre too pa los que vengan dempués. Pa que nun tengan namás que sentir grabaciones históriques y calcales, sinón que tengan tamién una referencia escrita y unes ferramientes d’aprendizaxe, enseñu y creación». «Con estes ferramientes otros músicos podrán averase a ella meyor y llevala a escenarios de tol mundu», añadió’l tamién multiinstrumentista y intérprete d’asturianada que destacó que la so obra contribúi al «conocimientu colectivu» y qu’apurre datos que van poder usar «otros trabayos que vengan detrás pa siguir creando conocimientu».
Como reflexones finales, Héctor Braga plantegó qu’anguaño’l xéneru ta «nun momentu mui difícil porque nun se fai más que cantar coses de repertorios clásicos» y cuestionó que «les lletres nun s’anovaron dende los tiempos que se falaba del trazáu del ferrocarril y la mina». Por eso plantegó que ye necesariu qu’haiga una actualización «con mensaxes que falen del smartphone d’otres coses d’agora» y s’alegró por que figures de tanta repercusión como Rodrigo Cuevas faigan guiños a l’asturianada; daqué que considera que beneficia a tola música asturiana. Nesti sen, remarcó que «fai falta facer más andecha, porque si nun yes un colectivu aprisiónente». Asina ye como en plural; dende’l presente. con crítica, pero tamién con propuestes, l’autor acabó la primer presentación -yá hai axendaes otres en Grau, Avilés, y Cabranes– d’una obra fundamental dedicada al xéneru musical más identificativu del país que va poder lleese bien pronto.
Suscríbite a les nuestres novedaes
