El 41 Concursu de Canción Asturiana d’El Comercio celebra les semifinales esti fin de selmana

La Plaza la República de Xixón acueye esti vienres 28 y sábadu 29 les actuaciones de les dieciséis persones clasificaes.

Eventos

El vienres pasáu entamó la 41 edición del Concursu de Canción Asturiana qu’organiza’l diariu xixonés El Comercio y esti fin de selmana celébrense les semifinales. Un total de dieciséis cantadores na estaya masculina y ocho na femenina van competir esti vienres 28 y sábadu 29, a les 18h, na Plaza la República del barriu d’El Coto. Quien se clasifique, va aportar a la final que va tener llugar los díes 4 y 5 d’agostu na Plaza Mayor de Xixón, siendo esti eventu coordináu por Valentín Fuente y con sofitu de Divertia, el Principáu d’Asturies, Caja Rural de Xixón y El Corte Inglés, ún de los clásicos del branu xixonés.

Les persones clasificaes que van actuar el vienres son, por orden d’actuación: Reyes Menéndez Rubio (Tinéu), Gabriel González Tuya (Villaviciosa), Javier Toral Fernández (Mieres del Camín), Aurora Platas Yáñez (Mieres), José García García (Cangas del Narcea), César González Fernández (Somiedu), Fernando Entralgo Vega (Xixón), Manuel Roza Llera (Colunga), Alicia Villanueva Megido (Bimenes), Celestino Rozada Tamés (Llanes), Lorena Corripio López (Colunga) y Andrés Cueli Robledo (Villaviciosa).

Per otru llau, el sábadu concursen Rubén Barredo Sánchez (Villaviciosa), Esteban Verdeja Martínez (Cantabria), Álvaro Fernández Conde (Cantabria), Fernando García Nuño (Siero), Liliana Castañón Cerceda (Mieres del Camín), Antonio González González (Cangues d’Onís), Águeda Riera González (Villaviciosa), Manuel Arenas Pérez (Peñamellera Alta), María Luisa Martínez Suárez (Xixón), Adolfo Uría Menéndez (Cangas del Narcea), Tatiana Suárez Díaz (Xixón) y Isaac Sierra Longo (Parres).

Xornada Moza

Nesta 41 edición destaca que per primer vez celebróse la Jornada Moza. Nella participaron, el pasáu domingu 23 nel Paséu de Begoña, seis intérpretes con edaes d’ente los 12 y 16 años. Fueron Jairo Pérez García (Piloña), Lucía Díaz Rodríguez (Llaviana), Ainhoa García García (Tinéu), Natalia Martínez Fernández (Grau), Néstor Díaz González (Llanes) y Marina Carbajosa González (Grau) los qu’amosaron asina’l futuru y el relevu xeneracional dientro de la tonada asturiana.