El 26 de setiembre de 2025 salió a la venta’l primer discu en solitario de Rubén Bada dempués de 30 años de trayectoria. Tres de presentar el CD n’escenarios de dientro y fuera del país, el reputáu multiinstrumentista publica los 18 temes que lu formen en toles plataformes musicales. Amás, hai unos díes estrenó’l videu de ‘NÓS (Jota-Gallegada)’, la tercera de les pieces audiovisuales del trabayu que llanza na so canal de YouTube.
Rubén Bada ye’l discu homónimu nuevu d’esti perconocíu músicu’l país. L’artista llanzó un «trípticu» que tien trés estayes –‘Guitarra‘, ‘Vigulín’ y ‘Cantares‘- na que caúna fai referencia a trés óptiques dende les que Bada mira’l folk y la música tradicional. En ‘Guitarra’ hai seis cortes con pieces interpretaes en xéneru instrumental col so instrumentu principal, emplegando’l so estilu de fingerpicking col que yá venía trabayando n’otros tantos proyectos. ‘Vigulín’ son cuatro cortes nos qu’ufierta pieces mui lligaes a la tradición del baille: xotes, muñeires, agarraos, etc., dalgunes tradicionales, otres de composición propia. ‘Cantares’ ye la parte dedicada a les coples y les melodíes tradicionales y populares, de chigre, pal baille, de tonada… Les igües d’estos temes son ocho ayalgues qu’amuesen quiciabes la visión más personal del músicu sobre estos repertorios.
Amás del álbum completu en CD y nes plataformes musicales, Bada va asoleyando na so canal de YouTube unos videos realizaos por Javi Lueje y Rubén Arena nos qu’interpreta en vivo dalgunos de los temes del discu. El primeru foi ‘Angelín nos Ozcos (Muliñeira)‘, llueu ‘El Veleta‘ y la selmana pasada llanzó ‘NÓS (Jota-Gallegada)’, «una composición propia al estilo de los bailles de la zona de Llanes».
Rubén Bada ye ún de los músicos de folk asturianos con mayor proyección internacional. Vigulineru, guitarrista y conocíu sobre manera por tocar el bouzouki, collaboró con grupos como Corquiéu, N’Arba, Dixebra… Foi miembru de DRD, Xéliba, L-R, amás de continuar col grupu Calea, y collaborar con una montonera grupos y agrupaciones na escena asturiana, ente los que se cunta Rodrigo Cuevas.
Suscríbite a les nuestres novedaes
