Esta mañana presentóse en rueda de prensa l’estrenu del videoclip de ‘Odisea La Nuí’, el tema col que La Bonturné ganó’l XVI Premiu Camaretá al Meyor Cantar n’asturianu. Ente los distintos premios d’esti gallardón ta la realización d’un videoclip y tres del so estrenu oficial -nel que participaron Antón García, Director Xeneral d’Acción Cultural y Normalización Llingüística del Gobiernu d’Asturies; Javier Lueje, Director y Realizador del videoclip; y La Bonturné– yá pue vese esta obra audiovisual na canal de Musicasturiana.com tanto na so versión orixinal como en formatu lyric videu.
El cantar ‘Odisea la Nuí’ ye una reinterpretación del poema homéricu na que Penélope asume’l papel protagonista. La historia surde d’un relatu curtiu del escritor asturianu Paco Álvarez, al que’l músicu David Varela –voz y acordión diatónica de La Bonturné- afixo lletra y punxo música. Va incluyíu nel trabayu discográficu A Contraforga que la formación bal-folk asoleyó en 2023.
El videoclip, discurríu y realizáu por Javier Lueje, cunta amás cola collaboración del iluminador Víctor Vivar, el maquillaxe d’Andrea Trabanco y el llabor de Rubén Arena como operador de cámara. Na parte escénica rescampla la participación de Etymos Danza, dirixíos por Candela Guerrero, con una interpretación qu’amuesa una gayolera dimensión visual y simbólica a la hestoria. El rodaxe tuvo llugar nel espaciu escénicu La Benéfica, en L’Infiestu (Piloña), una contorna bien apañada pal desendolcu técnicu y tamién emocional del relatu audiovisual.
Esti videoclip qu’entemez música y narrativa con sorna y danza -característiques que definen perbién a La Bonturné- tamién s’estrena con una «cara B»; una versión karaoke o lyric videu na que penriba d’una solombra cuasiestática del grupu actuando va pasando la lletra del tema, contribuyendo asina al enfotu d’espardimientu del conocimientu de la llingua asturiana que tamién busca’l Camaretá.
La Bonturné ye un cuartetu bal-folk formáu polos veteranos músicos David Varela (voz y acordión diatónicu), Merce Santos (zanfona), Santi Caleya (saxo sopranu) y David Casillas (contrabaxu). Gracies a algamar el XVI Premiu Camaretá actuaron per una ventena d’escenarios del tol país, consolidando la so trayectoria dientro de la música de raigañu contemporáneu. Cola publicación d’esti videu, dan un paso más na so trayectoria y contribúin al crecimientu d’obres audiovisuales musicales n’asturianu.
Suscríbite a les nuestres novedaes
