La Conseyería de Cultura, Política Llingüística y Deporte aprobó de manera anticipada la convocatoria d’ayudes pa la realización de festivales culturales en 2026, con una dotación global de 405.000 euros , según recueye’l BOPA publicáu’l pasáu xueves 8. La subvención máxima a recibir por proyectu ye de 25.000 euros y pueden presentase solicitúes hasta’l 5 de febreru pueden a traviés de la sede electrónica del Principáu
La convocatoria ta dirixida a entidaes ensin ánimu de llucro, profesionales, empreses y entidaes llocales que desarrollen la so actividá cultural dientro de la comunidá autónoma. Les ayudes concederánse en réxime de concurrencia competitiva y tienen como oxetivu fomentar una ufierta cultural de calidá al traviés de festivales y d’actividaes complementaries.
Les subvenciones estructúrense en cinco llinies, diferenciaes según el tipu de solicitante y la dimensión económica de los festivales. Dos d’elles tán destinaes a grandes festivales, con presupuestos superiores a 30.000 euros, tanto pa entidaes ensin ánimu de llucro como pa profesionales y empreses. Otras dos llinies sofiten festivales de menor tamañu, con presupuestos ente 6.000 y 30.000 euros, mientres qu’una llinia específica resérvase pa les entidaes llocales, que van poder optar a ayudes pa cualquier tipu de festival.
La cuantía máxima por proyectu va ser de 25.000 euros, ensin que l’aportación del Principáu pueda superar el 60 % del presupuestu total de l’actividá. En nengún casu van poder beneficiase d’estes ayudes proyectos que yá cuenten con otres subvenciones autonómiques pa la mesma finalidá o entidaes que reciban subvenciones nominatives nos presupuestos asturianos.
Los festivales subvencionables tienen que ser parte d’estayes culturales como la música, les artes escéniques, el cine y la televisión, les artes visuales o la lliteratura, y han de tar finalizaos enntes del 31 d’ochobre de 2026. Tola información ta nes bases de les subvenciones y na convocatoria d’esti añu.
Imaxe de Nay Semeya nel festival Artístiques.
Suscríbite a les nuestres novedaes
