Les xornaes profesionales de la industria musical entamaes pola Conseyería de Cultura, Política Llingüística y Deporte, Música en Rede, siguen dando novedaes de la so tercer edición. Dende Cultura en Rede -organizadora del alcuentru- tán acabante d’anunciar los doce grupos que van actuar nos showcases previstos pa los díes 14, 15 y 16 d’abril. Ente los doce proyectos escoyíos, hai siete rellacionaos cola música n’asturianu: Skama la Rede, Rubén Bada, La ciudá nel mar, Entós, Rubén Alba, Tania Pereira y Asturiana Mining Company.
Amás d’ellos, tamién van tocar Antonio Irún y Los Lobos, Tino Di Geraldo Quintet Astur, La Asturcumbia de los Míticos, Pablo Valdés Trío y Tuya. Los conciertos van ser d’entrada llibre, van tener una duración d’ente 30 y 40 minutos y van facese n’horariu de 18.30h a 22.30h. Entá nun s’anunció qué día actúa cada artista nin los espacios de les actuaciones, que provisiblemente van ser el Paraninfu de La Llaboral, Teatru de la Llaboral, Sala Albéniz, Sala Acapulco y otros posibles espacios singulares.
Nes próximes selmanes va siguir anunciándose la programación d’esti alcuentru profesional nel qu’amás de los showcases (Llabor), hai meses de debate (Conxustes), presentaciones (Rolda), talleres formativos (Erbíes) y puntos d’asesoramientu (en rede) pa que «artistes, profesionales y públicu tengan oportunidá d’interactuar y texer redes, amás de ser un escaparate pa visibilizar, dinamizar y profesionalizar la música emerxente fecha n’Asturies».
Na semeya, La Maramoniz actuando nún de los showcases hai unos años.
Suscríbite a les nuestres novedaes
