«L’enfotu de Loína va ser componer melodíes nueves con llínies basaes na tradición»

Esti sábadu 15 d’ochobre el Muséu Etnográficu del Oriente d’Asturies (Porrúa) va acoyer el segundu conciertu de Loína tres del so regresu a los escenarios. El tríu de folk de cámara formáu en 2010 polos hermanos Andrea y Rodrigo Joglar a la flauta y curdión diatónico xunto con Elías García -reputáu músicu fináu en 2019-, vuelve a l’actividá cola incorporación de Julio Rodríguez al buzuqui.

«Loína nació cuando nos propunxeron xuntanos pa facer un tríu de folk de cámara pal ciclu d’Igor Medio en Xixón. Dimos esi conciertu y dalgún más en 2011, pero llueu por tar un poco dispersos con más proyectos, foi quedando pendiente. Dempués pasó lo que pasó y yá nun hubo forma de siguir como quixéramos con Elías; foi tamién un toque d’atención pa dicinios qu’estes coses hai que faceles cuando se puede», comenta Rodrigo Joglar sobre los primeros pasos del grupu. Sicasí, más d’una década dempués surdió-yos la posibilidá de continuar el proyectu cola incorporación de Julio Rodríguez y asina «retomar aquel repertoriu y facer otru nuevu», añade Joglar.

Musicalmente Joglar define’l proyectu como «una banda de folk acústicu d’estilu atlánticu que sigue la llínia de grupos como DRD, Tuenda, Felpeyu, Llan de Cubel...». «Nun ye nada novedoso, pero non too tien que ser renovación de too y propuestes super nueves; si te sientes cómodu nun estilu hai que tocar nesi estilu que te presta y te divierte», sorraya’l músicu. El curdionista tamién destaca’l formatu: «prestábanos dalgo acústico colo que puedas facer dende un conciertu ensin amplificar nuna sala piquiñina en formatu de cámara, hasta dalgo más grande nun escenariu». amás sorraya que Loína supón la vuelta a tocar los dos hermanos xuntos nun grupu folk, dalgo que nun pasaba dende que pararon con Verdasca.

«Esti grupu responde tamién a la necesidá de dir componiendo melodíes nueves; non namás centrase na reellaboración de música tradicional sinón esmolecenos por intentar componer con llínies basaes na tradición. Y esti va ser l’enfotu que tengamos a partir d’agora». comenta Rodrigo Joglar. D’esta manera el tríu va dir dando conciertos en pequeñu formatu y siguir trabayando repertoriu. «Pel momentu nun preveemos grabar nun futuru inmediato pero too s’andará», esclaria’l músicu.

Relevu xeneracional

Andrea y Rodrigo Joglar pertenecen a una xeneración de músicos folk qu’entamó a tocar en grupos hai más d’una década, cuando yeren casique adolescentes. Cola perspectiva de llevar 12 años pisando escenarios pesie a la so mocedá, Joglar valora positivamente’l trabayu que tán desendolcando les xeneraciones que vinieron llueu de la d’él: «la verdá ye qu’agora hai xente mozo coles coses mui clares y con un nivel mui alto, que si bien nun son un númberu mui eleváu sí qu’hai un nivel mayor que na época na qu’entamamos nós a tocar y a facer grupos. Hai xente como Julio Rodríguez, Celia Corrales, Celia Nieto, más moces vigulineres y flauteros pela redolada de la sesión de L’Esperteyu… entós sí qu’hai relevu y de calidá». Asina ye como gracies al proyectos como Loína, el futuru de la escena folk preséntase más afayadizu.

Mercar discos folk na tienda online