Seis años dempués de qu’asoleyara’l so anterior CD, En Pie de Xera, Misiva vuelven a publicar un discu en formatu físicu: Mala Relixón, La banda moscona de punk-rock nun aparó d’editar novedaes nes plataformes musicales nesti tiempu y agora compílenles toes nesti discu formáu por 10 cantares: los tres del curtiumetraxe musical L’Últimu Aliendu (2020), el del videoclip La Misiva col que festexararon el so X+II aniversariu (2022), los cuatro del EP Mala Relixón (2022) y dos inéditos hasta agora: «Ensin gravedá» y «Celebrar».
«El nome del discu nada tien que ver con teoloxía nin con dogmes monoteístes, sinón con esos patrones, idees y programes que nos van yantando sele dende neños na escuela, na familia, na tele y agora nes redes sociales. Ye una llamada a garrar les riendes de la vida y volver al orixe y a prender esi llume que toos llevamos dientro», comenta’l grupu moscón pa presentar la filosofía d’esti álbum, envuelta nel diseñu del artista moscón Rubén Fdez «Rubonón».
Musicalmente vese la evolución nel soníu, nes lletres y nel estilu de la banda a lo llargo de los tres años nos que fueron grabando estos cantares, toos ellos rexistraos nos Ovni Estudios de Bonielles baxo los mandos de Pablo Martínez (Desakato). Un quintu álbum qu’amuesa la constancia y el bon facer d’una banda única dientro de la escena de la música asturiana.
Suscríbite a les nuestres novedaes
