Dende esta selmana yá tán disponibles en plataformes musicales los tres primeros trabayos de la reconocía cantadora de tonada asturiana Mariluz Cristóbal Caunedo: Misa asturiana de gaita (1998) -con El Gaiteru de Veriña y Pedro Pangua-, Onde la ñublina posa (2001) y Cantar de Seronda (2005), editaos pol sellu Fono Astur.
La carrera discográfica de Caunedo como solista de tonada entamó en 1998 cola grabación de la Misa asturiana de gaita xunto a José Antonio García Suárez «El Gaiteru de Veriña» y Pedro Pangua al tambor. Esti discu recueye la versión conservada nel conceyu de Quirós, la más estendía pel territoriu asturianu, con cuatro partes cantaes -Kyrie, Gloria, Sanctus y Agnus Dei- y cinco partes instrumentales.
En 2001, Mariluz Cristóbal Caunedo asoleyó Onde la ñublina posa, un discu imprescindible na discografía moderna de la tonada asturiana nel qu’anova’l xéneru calteniendo’l respetu y los mandaos de la tradición. N’él pueden sentise dellos cantares a solo como «A La Pipiona»; otros col acompañamientu tradicional de gaita o zanfona como «Debaxo d’una panera» y «De la llende los pastores»; con igües y acompañamientu de pianu -«Diendo camín de La Pola»-; percusiones y instrumentación propia d’otros estilos -gaita midi, sintetizadores, bouzouki, vigulín, mandolina-. Collaboren nel discu intérpretes perconocíos: Celia González, Xel Pereda, Vicente Prado «el Pravianu», Elías García, Héctor Braga, Jesús Arévalo, Fernando Arias, Ramón Prada, Yago Prada, Horacio Huerta, el Gaiteru de Veriña, Marcos Llope y Jose Ángel Hevia.
Cantar de Seronda (2005) aportó cuatro años dempués d’Onde la ñublina posa. N’él suenen melodíes tradicionales, vaqueires y cantares del repertoriu de grandes de l’asturianada como’l Gaiteru de Lliberdón, Ángel González «el Maragatu», «La Busdonga» o Diamantina Rodríguez. Vuelven a acompañala músicos destacaos: el tríu DRD -Dolfu Fernández, Rubén Bada y Diego Pangua-, Llorián García, Héctor Braga, Fernando Arias, Celia González, Alejandro San Pelayo, la Bandina’l Tombo -Marga Lorences, Dolfu Fernández, Pepín de Muñalén y Carlos Tejerina-, delles componentes del colectivu Muyeres, y otros. Cola dixitalización d’estos tres trabayos per parte de Musicasturiana.com, l’asturianada sigue espardiéndose per tolos países del mundu.
Merca los discos de Mariluz Cristóbal Caunedo
Suscríbite a les nuestres novedaes
