L’Ochobre Folk aporta a la décima edición enllenando Mieres de cultura’l país

Esti fin de selmana cumple diez años una de les cites más destacaes pa tola xente amante de la cultura tradicional: l’Ochobre Folk. Esti eventu entamáu pol Grupu Folclóricu Prau Llerón y el Conceyu Mieres va axuntar del 6 al 8 d’ochobre charres, pasacais, conciertos, talleres, actividaes pa la reciella, baille y xinta y bebida’l país. Too ello nel Parque Xovellanos y con una mayoría d’actividaes gratuites.

La décima edición del Ochobre Folk arranca’l vienres 6 a les 19h cola charra de Fonsu Fernández La Folcorización n’Asturies. Llueu, a les 20h, ye l’Alcuentru de Bandines nel que van participar L’Andecha Turcipié, Los Cuatrolán, El Busgosu y Los Llerones; y a les 22h ye la hora de fartucar cola Espicha Popular con un preciu de 15 € y menú d’espicha tradicional. Pa rematar esa xornada, a les doce hai Nueche en Danza con escenariu abiertu pa quien quiera participar.

El sábadu 7 la cita entama bien ceo. A les 10h, nel colexu Santiago Apóstol y con un preciu de 15 €, Luis Ángel Fernández Santos va dar un taller dedicáu a los bailles de la zona central d’Asturies: xota, saltón y muñeira. A les 12h hai otru taller de baille, pero esti empobináu pa la reciella, de baldre, nel Parque Xovellanos y impartíu por Loreto Suárez. Les y los rapacinos nun van aburrise porque llueu sigue la programación familiar: a les 13h Andrea Lobo va facer los sos Titecontos qu’amesten títeres, cuentos y música en directo y a les 18h hai xuegos tradicionales. Ente eses dos actividaes ta’l Vermú del país onde va haber daqué pa xintar y chumar.

Siete conciertos

A les 19h del sábadu entamen los siete conciertos que van allargase hasta’l domingu a mediudía. La primera de les formaciones n’actuar ye la Orquestina La Xarangana, a la que van siguir les pandereteres Abéu, la bandina del Eo-Navia Caldo y Os Rabizos, el grupu de música tradicional fusionada Algaire y el dúu d’electrónica de raigañu Llevólu’l Sumiciu. La programación d’esti eventu remata’l domingu cola venta’l bollu preñáu y un pintacares -dambes dende les 12h-, pasacais y vermú amenizáu por Los Gascones -a les 12.30h y 14h- y el conciertu pa tola familia Kikirikikí d’Alicia Álvarez y David Varela.

Discos de música tradicional y folk a la venta na tienda