Cúmplense noventa años de la Revolución d’Ochobre del 1934 y musicasturiana.com quier aprovechar esta data pa homenaxear a tolos homes y muyeres que llucharon nella. Por ello, asoleya en plataformes musicales el discu El son nos cantares de la Revolución d’Ochobre de 1934, una recopilación de melodíes y lletres populares venceyaes a la güelga revolucionaria y a la llucha obrera qu’espoxigó n’Asturies nesi tiempu. La grabación foi editada pol sellu Fono Astur en 1998 dientro de la colección «Cantos y bailles d’Asturies». Cola dixitalización d’esti trabayu, esti portal sigue avanzando nel envís de faer más accesible la música’l país per tol mundu.
El Grupu Cultural Xana de Perlora recuperó pa esta grabación materiales d’investigación del Catedráticu d’Historia Contemporánea Jorge Uría González y del archivu de Fernando Manuel de la Puente Hevia. El resultáu ye una escoyeta de más de doce rexistros d’informantes, arreglos instrumentales de los cantares recopilaos, composiciones a partir de testos históricos y dellos temes dedicaos a la figura d’Aida Lafuente. El trabayu ye, a la fin, un repasu a la historia revolucionaria del país al traviés de les coples y cantares d’antaño.
Suscríbite a les nuestres novedaes
