Va unos díes presentábase la plataforma Unidos por la cultura en Asturias con una recoyida de firmes en defensa de la música en vivo en chigres y otros llocales. El colectivu nació como respuesta a la denuncia presentada pola asociación Asturias de Noche contra’l programa Siente Xixón, una iniciativa del Ayuntamientu de la ciudá que facilita la programación de música en directo y otres manifestaciones artístiques, faciendo por llimitar los efectos negativos de la Llei 8/2002, de 21 d’ochobre, d’Espectáculos Públicos y Actividaes Recreatives. Dende’l Conceyu amosaron el so compromisu pa caltener esti programa.
«El pasáu vienres aconceyamos col conceyal d’Urbanismu y Festexos, Jesús Martínez Salvador, quien sorrayó la ‘defensa a capa y espada’ del programa nacíu en 2018, al empar qu’aseguró que ‘poques actividaes pueden xenerar un consensu tan altu como les de Siente Xixón«, manifestaron Unidos por la cultura en Asturias a traviés de les sos redes sociales. D’esta manera, Martínez Salvador destacó qu’esta iniciativa «multiplica de manera esponencial les actuaciones que se pueden disfrutar y da mayores oportunidaes al sector musical p’actuar tol añu».
En rueda de prensa, el conceyal de Festexos tamién comentó qu’en marzu pue salir la sentencia relativa a la denuncia presentada por Asturias de Noche y que les bases «van camudase tolo que seya necesariu y va mantenese’l programa«. Pel so llau, dende Unidos por la cultura en Asturias aseguraron que van siguir trabayando por camudar la llexislación en toa Asturies nesti sen porque, como argumenten, «la música en vivo nun ye namás entretenimientu; ye una parte fundamental de la nuestra identidá«.
Tamién aconceyó con Unidos por la cultura en Asturias la conceyala d’Izquierda Xunida-IAS-Más País nel Ayuntamientu de Xixón, Noelia Ordieres, que valoró’l llabor de Siente Xixón: «dinamiza los barrios de la ciudá con una ufierta cultural mui importante, constituyendo una ferramienda fundamental pa la promoción de la escena llocal». A la par, criticó la llexislación asturiana y afirmó que treslladaron «esta preocupación» al so grupu parlamentariu na Xunta Xeneral «qu’entamó les negociaciones coles conseyeríes competentes na materia pa da-y una solución a la problemática llocal». Precisamente, la reforma de la mentada Llei 8/2002, de 21 d’ochobre, d’Espectáculos Públicos y Actividaes Recreatives ye una de les cuestiones qu’abordó l’anterior conseyera de Cultura, Berta Piñán, na primer reunión de la Mesa Sectorial de la Música -2020-, ensin qu’hubiere más novedaes na materia.
Suscríbite a les nuestres novedaes
