Añu y mediu dempués del so únicu conciertu en nueve años -el del Teatru Xovellanos dientro del ciclu d’Encaja2-, va poder volver a vese otra vegada a Lucas 15 en directo. El próximu 11 de xunu a les 20.30h Xel Pereda va actuar con esti proyectu n’El Refugio de La Salvaje d’Uviéu. L’actuación forma parte de la programación de les Sesiones Delicuescentes qu’acueye esta sala y les entraes yá tán a la venta n’Entradium.com por un preciu de 12 euros.
Lucas 15 ye un proyectu musical de cultu dientro y fuera d’Asturies. Entama a dar los primeros pasos en 2006, cuando’l guitarrista Xel Pereda, de Llan de Cubel, propúnxo-y facer al cantautor Nacho Vegas un proyectu que reellaborara pieces populares asturianes en clave de rock alternativu. Asina dieron forma a un discu homónimu que s’asoleyó en 2007 y qu’algamó muncha sonadía ente la crítica especializada y el públicu.
La continuidá del proyectu frayó en 2016 cola anuncia de que nun diba salir pel momentu l’esperáu segundu discu que prometieren. Sicasí, Lucas 15 esconsonó con un conciertu a solu de Xel Pereda nel ciclu Encaja2 del Teatru Xovellanos n’avientu del añu pasáu. Una cita pa la que recuperó la so versión de ‘Los fayeos de Mayo’ y una parte instrumental de ‘Nel campu nacen flores’, y qu’intercala composiciones propies inédites, instrumentales basaes en cantares populares y tonaes, y les sos reinterpretaciones de les melodíes y lletres populares del país. El músicu consigue algamar una intimidá que trespasa la pantalla, con unes igües de guitarra interpretaes de manera maxistral y cantando cada una de les pallabres dende la sensibilidá. El conciertu de La Salvaje va ser una oportunidá pa poder ver too esto otra vuelta.
Suscríbite a les nuestres novedaes
