El baille’l país tien otres dos cites esti fin de selmana en Siero y Avilés. El vienres 14 el Teatru Auditoriu de La Pola va acoyer per primer vez l’Alcuentru de Folclor de Siero nel que participen tolos grupos de baille tradicional del conceyu. Per otru llau, el sábadu 15 n’Avilés el festival Caleyando qu’entama Ximielga la Saya aporta a la so séptima edición
A les 20h del vienres entama’l I Alcuentru Folclóricu de Siero. Nél participen les agrupaciones llocales GFI El Ventolin (La Pola), El Piñote (Argüelles), Cuélebre, La Sidrina y Principado (Llugones), amás de la banda de gaites Xiranda de Cualloto. Nesti eventu gratuitu entamáu pola Fundación Municipal de Cultura de Siero «caún de los grupos/bandes fadrá una muestra de la so forma d’interpretar el baille y la música tradicional, y dempués, habrá d’alguna sorpresina», comenta El Ventolín nes sos redes sociales.
D’otra banda, el sábadu 15 dende Avilés va acoyer el VII Festival Folklórico Caleyando qu’entama l’agrupación avilesina Ximielga la Saya. Nél van participar los organizadores del eventu xunto a La Sidrina de Llugones, Torreón de Cartes de Cantabria y Tierras Llanas de Toro y su Alfoz de Zamora. L’eventu ye de baldre y acueye de 12.30h a 14h baille na cai per delles zones d’Avilés; a les 18.30h un pasacáis d’agrupaciones y a les 19h actuación de les participantes na Plaza’l Parche.
Semeya de Lucía Garó del Festival Caleyando 2024.
Suscríbite a les nuestres novedaes
