Esta mañana La Benéfica de Piloña anunció a traviés de les sos redes sociales la triste noticia del fallecimientu de Sergi, «fundador de La Benéfica y piloñés por adopción y por amor». Por esta razón l’espaciu cultural cancela l’Antroxu en Danza que taba programáu pa esti sábadu 28 de febreru: «Sentímoslo munchu, pero los antroxos van y vienen y Sergi namás tuviemos ún«.
«El nuesu corazón, pídenos estos díes recoyimientu, recuerdos y munchos abrazos. Nun tamos en disposición d’ufiertavos l’Antroxu que vos merecéis», comunicaron dende La Benéfica que «abrirá esta selmana pa dellos eventos entamaos por otres asociaciones ya instituciones ayenos a la propia organización». «Habrá más fiestes nun futuru, claro que sí, porque celebrar ye lo que meyor se nos da y porque, pa ser sinceres, Sergi s’enfadaría muncho si nun lo ficieramos«, conclú’l comunicáu de La Benéfica.
Dende MUSICASTURIANA.COM llamentamos la perda d’esti compañeru del activismu cultural asturianu y mandamos un abrazu fuerte a les persones que formen parte de La Benéfica y a tola xente cercano a Sergi.
Suscríbite a les nuestres novedaes
