Yá pue vese en YouTube’l videoclip de ‘Al pie del cuera (maketa)‘, el tema nuevu del productor d’electrónica de raigañu Fruela 757. Esta obra lleva a una sonoridá mui distinta a la pieza del mesmu nome que grabaron en 2009 l’intérprete de tonada Celestino Rozada y el gaiteru Vicente Prado «El Pravianu»; la distorsión y la influencia de soníos metal dan-y identidá a esti tema que ye l’adelantu de Camín, un trabayu onde va sentise a «un Fruela dalgo diferente«, como asegura l’artista.
«Nesti casu tenía primero los arreglos y bastante claro lo que quería facer; escoyer el cantar que pegara con ello vieno dempués», desplica Javi Suárez -alter egu de Fruela 757- sobre la particularidá d’esta composición nueva. «Tuvi probando con varies opciones pero cuando alcontré esta grabación… Yera perfecta. Porque’l conxuntu, anque sea un cantar tradicional asturianu, tien sonoridaes a otres coses, a otres tierres. Dábame daqué que facía crecer les igües», añade’l productor.
Otra de les particularidaes ye que ye una «maketa», asina s’especifica nel títulu y asina lo desplica Suárez: «tenía’l cantar que m’encantaba y les imáxenes pal videu y nun me pudi aguantar a subilo. Pero claro, l’audio ta ‘en bruto’ por decilo asina. Punxi lo de maketa porque de xuru habrá cambios de mezcla y máster y demás cuando me ponga en serio a amestar el discu completu, que ta ensin acabar, pero necesitaba soltar esti cantar».
«Lo del videu vínome precisamente un día mientres conducía dempués de tar tol tarde trabayando nel discu. Cola música na cabeza. Pegábame pa ‘Cuera’ y pal discu en xeneral, que va titulase Camín«, desplica Fruela 757 sobre la idea que ta tres de la obra audiovisual qu’acompaña al cantar. En cuantes al discu, sorraya que ta «avanzáu, pero en proceso y ensin fecha de publicación». Amás, destaca que la llinia musical va siguir l’estilu d’esti ‘Cuera’: «Munchu ruíu y saturación, y doble bombu y sintes, claro. Fruela metaleru«.
Fruela 757 ye ún de los pioneros n’amestar música tradicional con electrónica, reggaeton, rap y otros ritmos etiquetaos como ‘urbanos’. Entamó esti llabor en 2008 y, d’entós pacá, publicó 16 trabayos en Bandcamp, actuó n’eventos mui destacaos y collaboró con artistes como Anabel Santiago o Algaire. Va tiempu que yá nun xube a un escenariu, pero sigue creando música y esti ‘Al pie del cuera (maketa’) ye una muestra d’ello.
Suscríbite a les nuestres novedaes
