El Festival Internacional do Mundo Celta de Ortigueira ye l’eventu más importante del xéneru na Península Ibérica y esti añu entama la 27 edición del Concurso Runas pa grupos noveles. Hasta’l domingu 26 d’abril pueden inscribise los grupos que tean interesaos en participar nesti concursu que tien como premiu principal actuar nel escenariu principal del propiu festival y, como novedá esti añu, nel Festival Internacional Sierra Celta de Huelva. N’ediciones recientes hubo presencia de bandes asturianes como Guieldu, Alienda, Picarós y Entós.
Runas tien dos fases; primero fáise una escoyeta d’un máximu de diez formaciones d’ente toles que manden candidatures. LLueu, el 4 de mayu, van dase a conocer los nomes y abrir una votación online pa escoyer a les trés finalistes. Les formaciones que lleguen a esta final van actuar el xueves 9 de xunetu nel festival d’Ortigueira con un caché por actuación de 2.000 €. Quien gane, va tocar na edición de 2027 d’esti mesmu festival con un caché de 3.000 euros; amás tamién van poder sumase nel mes d’agostu de 2026 al cartelu del Festival Internacional Sierra Celta, nel marcu de les Jornadas Medievales del Ayuntamiento de Cortegana (Huelva).
El Concurso Runas tien como oxetivu la difusión de la cultura y la música celta a traviés de la promoción de grupos nuevos, dándo-y siempre más pesu a les composiciones propies. Yá son más de 250 les bandes que pasaron per él, lo qu’indica la importancia d’esta plataforma de promoción de grupos enmarcada dientro d’esti prestixosu festival nel qu’esti añu yá s’anunció l’actuación del gaiteru asturianu Rubén Alba xunto a otros artistes internacionales pernomaos como Yves Lambert, Lúnasa, Solas, Noon o Anxo Lorenzo.
Suscríbite a les nuestres novedaes
