Dende güei hasta’l 30 d’agostu Avilés celebra San Agustín, les fiestes cimeres de la tercer ciudá d’Asturies. Na programación d’esti añu, a diferencia de n’anteriores ocasiones, rescampla l’ausencia total de la música n’asturianu y la presencia testimonial d’otres formaciones d’Asturies, llendándose les actuaciones llocales namás a la de la Banda de Música d’Avilés. Sicasí, l’Ayuntamientu sí que contrató a artistes vizcaínos, extremeños, catalanes, andaluces, chilenos o a grandes orquestes gallegues pa la so programación festiva.
La situación d’esti añu contrasta cola d’ediciones anteriores, como’l pasáu añu, nel qu’Avilés acoyó Sones na cai, un ciclu protagonizáu poles munches agrupaciones de música tradicional del conceyu, amás de qu’actúo’l grupu astur-francés LaGuinda. O va dos, cuando tocó Marisa Valle Roso. Pero anguaño na considerada por munches persones como «capital folk d’Asturies» -por mor de qu’a ella tán venceyaes formaciones de renome que tán actualmente n’activo como José Manuel Tejedor, Dixebra, Guieldu, Rubén Alba, Eva Tejedor & Les Pandereteres, Rubén Bada, Entós, Asturtralla o Bango, amás de les bandes de calter tradicional-, choca l’ausencia d’estos artistes na programación festiva del Ayuntamientu.
Ye llamativa la situación tamién por tar gobernáu Avilés por dos partíos que se presentaron a les elecciones con unos programes a favor de la oficialidá de la llingua asturiana, FSA y Izquierda Xunida; mientres que los equipos de gobiernu de Xixón y Uviéu, con unes posiciones muncho menos favorables al asturianu, sí que contrataron a artistes qu’interpreten la so música n’asturianu pa la so programación festiva. Na Villa de Xovellanos actuó na Semanona Nacho Vegas y Marisa Valle Roso, amás de que l’axenda del branu xixonés acueye otres seis programaciones gratuites nes que la música asturiana ye protagonista. D’otra banda, en San Mateo va actuar Rodrigo Cuevas nun formatu privatizáu -ello ye, entrada de pagu pa unes fiestes públiques-, amás de PVXARRA y Tania Pereira na Plaza’l Paragües.
Pesie a la situación xenerada coles fiestes de San Agustín d’esti añu, la música n’asturianu sí que suena n’Avilés gracies a la iniciativa asociativa y privada: l’Intercélticu d’Avilés y Comarca entamáu por Esbardu o la Seronda d’Avilés y les actividaes del Aula Didáutica de Cultura Popular Asturiana d’Escontra’l Raigañu, son dalgunos exemplos. Per parte l’Ayuntamientu, pa la programación de les Fiestes del Bollu sí que contrata a artistes d’esta escena.
El casu d’Avilés ye exemplu d’una realidá qu’afecta a la escena sonora d’Asturies: la de la escasísima contratación per parte d’ayuntamientos y comisiones de fiestes a artistes de la música n’asturianu y/o d’Asturies. Daqué que munches vegaes nun ta rellacionao con una intencionalidá política, sinón por propiu desconocimientu o falta d’interés de quien programa. Sicasí, esta ye situación que daña al sector profesional y amateur d’esta escena y que sigue un camín contrariu al de la realidá d’otros territorios vecinos.
Suscríbite a les nuestres novedaes
