Hai unos meses presentóse públicamente Voblanaes, una iniciativa cola que la estaya xuvenil del coru Voces Blancas del Nalón versionen cantares tradicionales asturianos y otros actuales de Vero Rubio, Guieldu, Muyeres, Fernando Valle Roso, Héctor Braga y Elisabeth Montequín; too ello cola collaboración d’artistes plásticos y audiovisuales pa crear un espectáculu que va estrenase’l próximu 19 de setiembre en La Benéfica. Les entraes yá tán a la venta por 15 euros na web del crowdfunding que ta faciendo esti proyectu pa poder viaxar hasta Viena’l próximu mes de payares y asina llevar la música asturiana hasta’l prestixosu 12th International festival of choirs and orchestras.
«Una ventena de componentes crearon, coles sos voces y la so forma d’espresión un conciertu musical y visual», despliquen dende esta iniciativa que siempre tuvo bien clara una filosofía de texer redes ente manifestaciones artístiques: «Nun queremos namás interpretar arreglos y composiciones ayenes. Buscamos crear y collaborar y facer del nuestru trabayu musical daqué que nos venceye con otros artistes presentes na actualidá musical d’Asturies. Varios músicos cediéronnos ún de los sos cantares p’adaptalu y interpretalu acordies a les particularidaes de l’agrupación coral«, añadende dende Voces Blancas del Nalón.
Amás de la música, el proyectu de moda de raigañu Ringo Rango fai la indumentaria de los intérpretes nel espectáculu; Juan Díaz-Faes va facer una intervención artística en directo; y los y les artistes plástiques Isabel Muñoz, Istrice Ilustra, Sergio Dosal, Hugo Priede, Celia Pandiella, Mario Hidalgo, María Ortiz, Nievesita, Bruno Galán y Alfonso Zapico fixeron unes llámines pal micromecenalgu de la iniciativa al que tovía pueden facese aportaciones: recaldaron 14.575 € y, anque pidíen algamar un mínimo de 13.750 euros, nagüen por llegar agora hasta los 23.650 euros.
«Ensin entrar muncho en detalle, va ser un espectáculu nel que la música y los cantares seyan les protagonistes. Nun va haber muncha esplicación nin presentación de los cantares, sinón que pretendemos que toles melodíes sigan un filu qu’amuese’l mensaxe xeneral que buscamos llanzar: cantar xuntos ayúdanos a entendenos, a entender a otros, a dialogar colos que nos arrodien y colos que nos precedieron. Cantando xuntos y xuntes conectamos cola tradición, col presente y col futuru dende un llugar amable y sollerte dende’l que mirar», desplicaron responsables de Voblanaes al rodiu l’espectáculu nuna entrevista en MUSICASTURIANA.COM. El sábadu 19 de setiembre a les 20h va poder vese el resultáu de tou esti trabayu desendolcáu pola estaya xuvenil de Voces Blancas del Nalón tres «munchos meses de trabayu, muncha creación, collaboración y entrega por una cultura que nos une».
Suscríbite a les nuestres novedaes
