Esti viernes 10 de setiembre entama la segunda edición del Festival Al Resve, eventu qu’organiza la Fundación Municipal de Cultura de Xixón y que va enllenar el barriu altu del conceyu d’artes plástiques y escéniques, llingua asturiana, tonada, folk, bandines de romería, instrumentos del país y tecnoloxíes aplicaes a la música de raigañu.
«El festival “Al Resve” va celebrase del 10 al 19 de setiembre pel tiempu les fiestes del barriu Cimavilla, al que-y queremos dar puxu como conceptu y espaciu cultural, al empar qu’apostamos por amosar la creatividá d’Asturies nes sos estayes artístiques cabezaleres», comenten dende la organización a la par que destaquen el formatu d’esti añu, caracterizáu por sacar la cultura a la cai y facer toles actuaciones n’espacios públicos. D’esta manera, la Plaza la Soledá, la Plaza Xovellanos, La Plaza’l Marqués y El Llavaderu van ser los escenarios nos qu’amosar la calidá y diversidá de la creación cultural autóctona.
La programación yá ta disponible nesti cartafueyu y na web del Ayuntamientu y los eventos musicales van ser el conciertu inaugural de Toli Morilla -el viernes 10 a les 20.30h na Plaza Xovellanos-; conciertos pa la reciella con Alicia Álvarez y David Varela -sábadu 11 a les 13h na Plaza la Soledá- y Fernando Valle Roso y Silvia Moreno -sábadu 18 a les 13h na Plaza Xovellanos-; tonada asturiana renovada con Ún de Grao y Antón Menchaca -sábadu 11 a les 19.00h y 20.30h na Plaza la Soledá-; bandines pal baille con La Garrapiella y Xe de Xota -el domingu 12 dende les 13h en delles places de Cimavilla-; música electrónica asturiana con Fruela 757 y Tever -domingu 12 a les 19h y 20.30h na Plaza la Soledá-.
Pal segundu fin de selmana garren el protagonismu les actuaciones corales col Coru Voces de Cimavilla y la Coral San Antonio -viernes 17 a les 19h y 20h na Plaza la Soledá-, la música tradicional de pandereta con Cantaruxare y 6 Riales -sábadu 18 a les 19h y 20.30h na Plaza Xovellanos-; les escueles de música tradicional con La Quintana y Villa de Xixón -domingu 19 dende les 13h na Plaza Xovellanos-; y el folk asturianu de Rubén Alba y Nel de Purnea y Rubén Bada y Pepín de Muñalén -domingu 19 a les 19h y 20.30h na Plaza Xovellanos-. Toles actividaes son de baldre y ensin necesidá d’acutar plaza previamente.
Suscríbite a les nuestres novedaes
