En 2018 cuatro adolescentes de Xixón venceyaos al Grupu Folclóricu Trebeyu crearon Abéu, una formación de voz y percusión tradicional. Pasín a pasu, esti grupu foi dando conciertos, ensayando, andando a la gueta d’un soníu que-yos convenciera… medrando, a la fin. Y güei pue sentise en toles plataformes musicales un reflexu de tou esi trabayu: ‘L.LIXEROS’, el primer adelantu del que va ser l’estrenu discográficu d’esti proyectu.
«El cantar amesta les melodíes y lletres tradicionales de trés lixeros recoyíos nel conceyu de L.lena. Ye una pieza con muncha fuercia qu’escoyimos como primer single porque reflexa mui bien el soníu xeneral del discu y cómo queremos presentar esta propuesta nueva», desplica Paula Vega, voz y panderetera n’Abéu.
Vega comenta tamién qu’anque entá nun haiga «fecha fixa de llanzamientu del discu», calcula que s’asoleye «na primavera de 2026«. Amás asegura que va haber «munches novedaes, collaboraciones y sorpreses» y avanza más detalles sobre esti trabayu grabáu nos Tutu Estudios cola producción de Sergio Rodríguez: «podréis sentir pieces más movíes como’l casu de ‘L.LIXEROS’ y otres más sele, pero toes enfocaes al baille y respetando les sos estructures».
«Quiximos esperimentar y arriesgar pero calteniendo siempre’l soníu que nos caracteriza», sorraya la cantante y panderetera. Un soníu que «dempués de varios intentos dende la creación del grupu y de tener la sensación de nun dar cola tecla«, hai un tiempu qu’algamó «la dirección que más representa a Abéu», añade l’artista.
Tres del llanzamientu d’esti primer single el cuartetu formáu por Paula Vega (voz y percusión), Óscar Vega (voz y percusión), María Blanco (voz y percusión) y EduLlosa (voz y percusión) tien yá los siguientes pasos a la vista. El llunes 10 de payares a les diez de la mañana llancen una campaña de crowdfunding p’ayudar a financiar los coses de la publicación del álbum. Nesta campaña va haber «unos packs muy variaos con una montonera de recompenses pa que la xente pueda escoyer la que más-y preste», desplica Paula Vega.
Asina ye, como siete años dempués del so nacimientu, a eses adolescentes llegó-yos el momentu d’amosar que maduraron y fáenlo con ilusión col futuru: «tovía queda lo más duro, pero facémoslo felices y con munches ganes«, conclúi la componente d’Abéu.
Suscríbite a les nuestres novedaes
