L’Asociación d’Intérpretes de Canción Asturiana (AICA) ta acabante d’anunciar dos actividaes nueves pa esti mes: la segunda xornada de L’Asturianada ye prestosa -esti vienres 12 de xunu en Cabranes-, y un cursu de voz que va dar Mapi Quintana en Xixón a lo llargo de cuatro díes. Les actividaes tienen l’oxetivu d’afondar na formación técnica y cultural de quien participe d’elles.
L’Asturianada ye prestosa ye un ciclu que quier facer «un viaxe a la escencia de l’asturianada» na que va poder deprendese sobre la «hestoria, tradición y voces que caltienen viva» la forma más vieya de cantar n’Asturies. La iniciativa arrancó’l vienres 29 en mayu Bimenes, va pasar per un total de doce conceyos, y esti vienres 12 de xunu fai la segunda parada na Casa Cultura de Santolaya (Cabranes).
A les 18h la Casa Cultura de Santolaya entama esta xornada na que va haber una ponencia d’Iván Rionda, estudiosu del xéneru; participa la «lleenda viva» Lolo Cabranes y llueu los cantadores Fernando Valle Roso y Marina Carbajosa xunto al gaiteru Rodrigo Joglar van facer un bloque formativu téoricu-prácticu pa resolver duldes, deprender tonada y descubrir cómo ye’l so acompañamientu cola gaita. Dende AICA despliquen que l’actu va rematar con un espaciu p’animar «a dar el pasu a cantar o acompañar a la gaita con orientación d’estos mayestros».
D’otra banda, el llocal d’AICA en Xixón acueye los díes 19, 20, 26 y 27 de xunu un cursu de voz impartíu pola artista Mapi Quintana. Ta enfocáu a la técnica vocal, respiración, puesta n’escena y otres cuestiones y dirixíu a tolos públicos. Hai places llimitaes, la formación ye gratuita pa les persones asociaes a AICA y pa informase pue facese a traviés del teléfonu 627401767.
Suscríbite a les nuestres novedaes
