El pasáu 19 d’avientu inauguróse en L’Infiestu La Maléfica, un chigre cultural nuevu que naz al rodiu La Benéfica, l’espaciu cultural qu’impulsó Rodrigo Cuevas xunto a otres persones. Esti vienres 16 dende les 20h actúa nél la cantadora d’asturianada Alicia Villanueva acompañada por Andrea Joglar a la gaita, amosando’l compromisu qu’esti llocal tien cola canción asturiana y qu’asina reivindica’l propiu Cuevas: «Creemos qu’hai una necesidá de chigres onde se cante y queremos cuidar l’ambiente y la canción asturiana«.
«Cuasi tolos fines de selmana fines de semana queremos dedicar un día al cantu popular asturianu: cancios de chigre, tonada, o coses más tradicionales, pero sobre manera lo que creemos que ye más propio del chigre -tonada y cantares-, porque la música pal baille tamién ye natural del chigre, pero tamién notros espacios y el chigre ye como’l templete de l’asturianada, de los cancios de chigre y eso préstanos pola vida», añade Rodrigo Cuevas sobre la importancia que va tener esti xéneru popular na programación d’un llocal que tamién quier «cuidar muncho la cultura de la sidra«.
Esta apuesta pola canción asturiana yá se vio dende’l día de la inauguración, nel que cantaron Mariluz Cristóbal Caunedo y Odón del Paganéu. Amás, los cantares populares tamién tuvieron presentes hai unos díes nesti espaciu gracies un taller de canciones navidiegues asturianes que punxo Santi Galguera y a unes xuntances de cancios de chigre.
«La Maléfica ye una de les pates de La Benéfica. Dende l’entamu siempre facer un chigre que sirviera de sala de programación pa coses de pequeñu formatu o más informales«, desplica Rodrigo Cuevas sobre esti proyectu que va siguir entamando actividaes «ensin amplificación y de formatu pequeñu, porque l’aforu ye de 60 persones: presentaciones de llibros, conciertos pequeños, etc».
Una muestra d’ello ye l’actuación que va dar Alicia Villanueva (Bimenes, 2000), cantadora qu’entamó na tonada con namás 9 años. Alumna d’otra figura pionera –Anabel Santiago– y nieta y bisnieta de dos muyeres cantores, tien participao en concursos de canción asturiana dende que yera una neña, algamando los primeros premios en varios d’ellos como’l II Premiu d’Asturianada Obdulia Álvarez «La Busdonga», el XXXIX Concursu de la Canción Asturiana d’El Comercio, el XXII Concursu de Tonada de La Nueva o’l XI Concursu de Canción Asturiana Conceyu de Siero. Ye ensin dulda, ún de los nomes de futuru de l’asturianada.
Semeya de Lucía Garó.
Suscríbite a les nuestres novedaes
