Tres d’unes selmanes ensin actuar en directo, Diañu Blues vuelven a dar un conciertu esti sábadu 28 de febreru. L’escenariu va ser los Kuivi Almacenes d’Uviéu, a les 21h y con entrada llibre. Nesta actuación va poder vese a la banda reconvertida nun power-tríu. Fran Fidalgo (baxu y voz), Pablo Nogueiro (guitarra y voz principal) y Miguel Bronco (batería y voz) son los trés componentes actuales d’esti grupu «dedicáu al reciclaxe xabaz de grandes clásicos del blues-rock de los años 60 y 70 na so versión más fiestera y ximielgona».
Diañu Blues nació en Xixón en 2017 y tienen la particularidá de ser la primer -y única- formación n’interpretar blues cantando dafechu n’asturianu. Depués d’un llustru pisando escenarios, publicaron en 2021 nes plataformes dixitales el so primer material grabáu; cuatro cantares agrupaos en dos EP, Collacios y El Bail.le, que taben formaos por canciones propies y dalguna adaptación al asturianu de clásicos del blues.
En 2023 tornaron en formatu CD y en plataformes dixitales con ¡Puxa’l Ximielgue!, cinco temes grabaos nos Estudios ACME nos qu’andechó Javier Silva al saxu, collaborador habitual nos sos conciertos; lo mesmo que Gary Parfitt a la harmónica. Asina presentaba’l grupu en redes sociales l’EP: «Facemos el nuestru homenax al titán del ximielgue, Albert King, con un par de temes -‘Viaxeru’ y ‘Nun me mientas’- que ‘diañuzamos’ pa la ocasión. Tamién incluyimos un par de temes yá conocíos como son el ‘Pucuñín’ y ‘El baiḷḷe’; nun pudimos evitar grabalos de nuevo depués de comprobar cómo se veíen potenciaos col saxu… Pa zarrar facemos otru cantar propiu, ‘Midnight Blues’, tamién habitual nos nuesos conciertos, nesti casu n’inglés y daqué más sele que’l restu temes». El conciertu d’esti sábadu ye una oportunidá pa poder ver en vivo a una de les formaciones más distintes y orixinales de la escena rockera n’asturianu.
Suscríbite a les nuestres novedaes
