El 22 de payares foi una de les nueches más fríes y, al mesmu tiempu, de les más fáciles de calecer en munchu tiempu. Pa dalgunos esa fecha taba marcada nel calendariu: volvía’l Conciertu pola Oficialidá seis años depués. Pa min, esti diba ser el primeru (si nun cuntamos aquella gala de la Banda Sonora pola Oficialidá nel Teatru Palacio Valdés d’Avilés nel añu 2021), asina que, anque nun tuviera les mesmes característiques que los clásicos Conciertos pola Oficialidá, l’eventu prometía. Decidíu, garré la cámara, porque una ocasión asina pagaba la pena documentala, y fui a Kuivi Almacenes.
«Pa dalgunos esa fecha taba marcada nel calendariu: volvía’l Conciertu pola Oficialidá seis años depués. Pa min, esti diba ser el primeru»
Aporté al recintu pronto y, magar de que l’apertura de puertes taba anunciada pa les 19:00 hores, a les 19:45 entá nun se pudiera entrar na sala. Ello provocó que la xente esperara tomando daqué na zona del merch, onde se podía ver bonos amigos realcontrándose y a munches persones pasando pel photocall que la Xunta pola Defensa de la Llingua Asturiana montara, ente elles les propies artistes que diben xubir al escenariu o Marisa Valle Roso, ente otres.
Poco depués de les 20:15, l’escenariu de Kuivi Almacenes encendía lluces y Asturxules, el dúu d’influencers n’asturianu, salíen al escenariu pa dar entamu al eventu. Qué suerte pa esta llingua minorizada poder cuntar con estes dos persones na reivindicación del nuestru idioma, con xente como elles hai, de xuru, futuru pal asturianu. Con ello, Marina García y Elena Álvarez empezaron la presentación con un recuerdu a los mineros finaos va unos díes nel conceyu de Cangas del Narcea, reivindicando la hestoria minera d’Asturies y, de la mesma, denunciando’l xenocidiu del pueblu palestín per parte del estáu d’Israel.
La primer sorpresa de la nueche fue perprestosa, cuido que pa tol mundu. Xuacu Amieva y Emilio Fidalgo xubieron al escenariu ensin haber anuncia nos cartelos del XXXII Conciertu pola Oficialidá y tocaron, como nun podía ser d’otra manera, la ‘Marcha de Brañes‘, pero tamién un cantar nuevu que llevaba por nome ‘Palestina Llibre‘. Con estes pieces y el pasu breve pelos focos del Kuivi, los primeros aplausos enllenaron la sala. Yo, qu’andaba ente’l públicu a la busca del planu perfectu pa les semeyes, sentía l’aprobación xeneral de la xente, con comentarios nos que recordaben anécdotes d’ediciones pasaes y celebraben la vuelta d’unu de los eventos más importantes de la reivindicación llingüística xunto cola manifestación del Día de les Lletres, tamién n’Uviéu.
«Sentía l’aprobación xeneral de la xente, con comentarios nos que recordaben anécdotes d’ediciones pasaes y celebraben la vuelta d’unu de los eventos más importantes de la reivindicación llingüística»
Asturxules volvió a escena pa presentar, esta vegada sí, a la primer banda de la nueche musical asturiana más reivindicativa n’años. Con ello, Alienda salió a defender los sos propios temes mientres la primer hora del eventu y recordar que’l so últimu pasu per esti eventu fuera va 10 años. Fixeron asina un repás ampliu de la so discografía y con delles paraes pa reivindicar la oficialidá del asturianu, pero tamién pa facer alcordanza del so gaiteru principal, Illán Escalada, ausente por baxa médica. Coles mesmes, entamaron col cantar ‘El Valse’, non ensin enantes dedica-ylo a aquella xente que «anque nun tuvieren físicamente, siempre nos acompañen» y mentando a David Rivas, Xuan Bello y, sobre manera, a Damián Barreiro, activu militante de la XDLA que nos dexó a principios d’añu. Tres los momentos emotivos, los cantares volvieron sonar con delles fileres de baille frente al escenariu ya inclusive cola participación d’Ana Feito y Alba Estrada, de Rellume, qu’echaron dellos bailles arrodiaos de les artistes d’Alienda. Pa poner el ramu, dos de los cantares más celebraos y cantaos pol públicu: ‘Como’l Cuélebre’ y ‘Rucaúres‘.
Remataba asina la segunda actuación de la nueche. Col cambéu d’escenariu, la xente aprovechaba pa recargar los vasos y siguir comentando ediciones pasaes, mientres na pantalla podía vese la gala de la Banda Sonora pola Oficialidá, lo que facía remembrar entá más momentos de tolos Conciertos pola Oficialidá nos que tuvieren. Como principiante nesto, naguaba por poder vivir dalguna d’eses ediciones, pero nun se puede viaxar nel futuru y entá quedaba muncha nueche por esfrutar.
«Alienda dedicó ‘El Valse’ a aquella xente que ‘anque nun tuvieren físicamente, siempre nos acompañen’ y mentando a David Rivas, Xuan Bello y, sobre manera, a Damián Barreiro»
Marina y Elena volvieron pa presentar a la siguiente banda. Sicasí, enantes d’ello anunciaron que’l cartelu d’entraes esgotaes yá se colgara, celebrando l’ésitu de la xornada. Darréu, yera’l turnu d’Herbamora, con una presentación del dúu nel qu’aprovecharon pa denunciar el tapecimientu de les muyeres a lo llargo de la hestoria y reivindicar tamién el so papel como tresmisores de cultura.
Herbamora, unu de los grupos que más anovamientu vienen amosando nos meses postreros, salieron al escenariu entemeciendo dalgunos de los clásicos de la so trayectoria con dalgunos de los temes nuevos como ‘Lluna de Sangre’ o ‘Eclipse total’, col que llegaron esti añu a la final del Premiu Camaretá al Meyor Cantar. Tampoco faltaron pallabres d’alcordanza pa los mineros finaos y que tocaben de cerca a l’artista Elena Rodríguez. Les primeres posiciones de la sala fueron, como non, pa les files del baille, que percorríen de llau a llau la nave del Kuivi y a les qu’hasta se xunieron les integrantes d’Herbamora nuna ocasión. Pa rematar, ‘Yerbabuena’, un cantar clásicu que nun podía faltar nuna cita como esta.
Fin d’otra actuación y vuelta al paséu pela barra del chigre. Nesi intre, eché una vuelta alredor y foi un momentu de reflexón. La xente qu’allegara al Conciertu pola Oficialidá yera mui heteroxéneo: mesmo había families, que vieyos o adultos, pero sobre manera muncha mocedá nos primeros puestos. Esi foi un sintoma perbonu de la situación de la reivindicación llingüística: la xente mozo ta averándose a la música fecha n’asturianu pol anovamientu que se vien dando nestos años últimos.
«La xente qu’allegara al Conciertu pola Oficialidá yera mui heteroxéneo: mesmo había families, que vieyos o adultos, pero sobre manera muncha mocedá nos primeros puestos»
El puntu fuerte de la nueche taba a poques de llegar y l’ambiente taba no cimero. Dixebra acudía otra vuelta la cita pola reivindicación llingüística, como yá fixera tantes otres veces. Sicasí, yera daqué diferente nesta ocasión y eso notábase ente’l públicu. La banda mítica del rock n’asturianu llevaben ensin dexase ver dellos meses y volvía a tocar nunu de los espacios onde meyor saben movese, nel de la reivindicación dende la música. Los himnos de la banda resonaron mientres la siguiente hora, nun pudiendo faltar temes como ‘Don Vito’, ‘Dime cómo ye’, ‘Asturalia’, ‘La Danza’ o ‘Nun llores’. Los temes más iconicos siguieron sonando, pero tamién con tiempu pa l’alcordanza de nomes tan importantes na llucha social d’Asturies como Tino Brugos, Xuan Bello, Fran Gayo o Damián Barreiro, otra vuelta. Maxi, de Fe de Ratas, salía tamién al escenariu pa cantar ‘Mañana Fría’ enantes de la despidida y la espera polos bises. Una actuación que remataba con ‘Esto ye Asturies’ y que reafirmó que nesta tierra ta tolo que sentimos.
Tres el momentu d’euforia y folixa que supunxo esti conciertu, l’espaciu quedó cuasi vacíu, cola xente saliendo fuera y visitando la barra pa garrar fuercies. Aportara’l momentu del zarru del XXXII Conciertu pola Oficialidá, que recayó en Llevólu’l Sumiciu. Los hermanos que formen esti dúu de lletrónica yeren los únicos artistes que s’estrenaben nesta cita de la reivindicación al traviés de la música y, col so set, tuvieron al altor. L’espaciu volvió enllenase de xente, sobre too de xente mozo, grupu de población que más escucha esti tipu de músiques y los dos hermanos esfrutaron ente’l perréu y los audiovisuales proyectaos. Foi tamién una nueche especial pa ellos non solo por estrenase equí, sinón por ser el cumpleaños del so pá, al que tol públicu-y cantó’l ‘Cumpleaños Feliz’, con dedicatoria incluyida per parte de Pablo Alonso pol sofitu dende l’entamu del proyectu musical.
«Un primer Conciertu pola Oficialidá nel que s’axuntaron los espíritos de toles ediciones anteriores col aliendu de los tiempos nuevos y la mocedá que puxa pol futuru del idioma del nuestru país»
45 minutos de set que punxeron el ramu a una nueche especial no reivindicativo y no personal. No que cinca a lo primero, volvió una cita necesaria con un anovamientu nes formes y qu’esperamos que siga repitiéndose y adaptándose a los tiempos que cuerren. No personal, un primer Conciertu pola Oficialidá nel que s’axuntaron los espíritos de toles ediciones anteriores col aliendu de los tiempos nuevos y la mocedá que puxa pol futuru del idioma del nuestru país.
Suscríbite a les nuestres novedaes
