Algaire asoleya ‘Llume’ en collaboración con Ahez

Tres de llanzar la selmana pasada’l videoclip, dende güei yá ta en toles plataformes dixitales la nueva versión de “Llume” d’Algaire que cunta cola collaboración d’Ahez, tríu bretón que representó a Francia n’Eurovisión 2022. Dirixíu pola productora asturiana Báltico, el videoclip entemez lo performativo colo narrativo, con imáxenes que per un llau amuesen a les artistes y per otru llau cuenten una historia d’amor que llucha por manifestase. Falamos con Algaire d’ello.

¿Cómo surde esta collaboración y qué tal la esperiencia?

La idea de facer dalgo con Ahez surde nel mismu llugar nel que surden munchos de los nuestros proyectos, que ye en La Llocura, en Mieres, una tarde na que tábemos poniendo en común distintes idees pa facer un videoclip nuevu. Pa esta vegada, apetecíanos facer una collaboración con dalgún invitáu especial, asina qu’entamamos a pensar opciones. En mediu d’esa tormenta d’idegues, salió Ahez. A toes paeciónos que podría ser mui interesante preparar dalgo con elles, y que podíen danos mucho xuegu pal videoclip. Nesi momentu punxímonos en contactu, desplicámos-yos la idea que teníemos na tiesta, encantó-yos y punxímonos a ello. La esperiencia con elles foi brutal; la verdá que se volcaron con ello, ficiéronlo too mui fácil y desendolcaron un trabayu mui buenu a la hora d’iguar el tema, y particularmente, cantar nuna llingua que nun ye la suya. Tando grabando en Tutu, cuando les sentimos cantar n’asturianu, punxéronnos el pelleyu de pita. Amás, pasar dellos díes con elles sirvió pa decatanos de les munches idees e inquietúes que tenemos en común.

Aparte de la collaboración, tamién hai novedaes na lletra. ¿Por qué?

Pa esta versión tamién quisimos añadir al tema una estrofa cantada en bretón. Foi dalgo que, una vez tuvimos clara la collaboración con Ahez, surdió de manera natural. Per una parte, por da-yos a elles un mayor protagonismu dientro de la collaboración, y per otra, por facer un guiñu y agradecimientu a Bretaña y a los sos músicos, y en particular al Festival Interceltique de Lorient, del que volvimos con mui bonos recuerdos de l’añu pasáu. Como curiosidá, una de les coses que fizo posible xuntase con Ahez foi’l fechu de que Marine, una de les sos integrantes, viera un conciertu nuestru nel Espace Bretagne, nel qu’ella tamién actuaba dempués con otru proyectu.

«Punxéronlo too mui fácil y ficieron un trabayu mui buenu a la hora d’iguar el tema, y particularmente, cantar nuna llingua que nun ye la suya. Cuando les sentimos cantar n’asturianu, punxéronnos el pelleyu de pita»

¿Qué buscais tresmitir col videoclip?

“Llume” nun dexa de ser un cantar que xira alredor d’una hestoria d’amor de temática clásica, lo que a la hora de plantegar un videoclip, supón un estra de dificultá al pensar en idees o recursos que se salgan de lo típico y nun ten mui trallaos. Visualmente, parte del encantu de facer la collaboración con Ahez yera’l xuegu que podía dar el
fechu de tener 3 muyeres en cada grupu. Nel videoclip búscase cola so presencia y la fuercia de les sos voces tresmitir una idea d’amor llibre y ensin fronteres, qu’apaez representada nes figures d’Hugo y Daniel, los protagonistas de la hestoria.

Esta collaboración pue ayudar a reforzar la vuestra presencia fuera d’Asturies. ¿Cómo ta siendo hasta agora?

Pel momentu, nun podemos tar más emocionaos y agradecíos pola acoyida que ta teniendo’ videoclip tanto dientro como fuera d’Asturies, sobre manera en Bretaña, onde’l públicu de les nuestres compañeres recibió la collaboración con muncho ciñu y con espíritu d’hermanamientu, que yera la intención a la fin. Obviamente, pa Algaire, una de les nuestres motivaciones al facer una collaboración con un grupu foriatu ye precisamente buscar el danos a conocer en llugares nuevos y llevar la nuestra música a otros públicos.

«El públicu de les nueses compañeres recibió la collaboración con muncho ciñu y con espíritu d’hermanamientu, que yera la intención a la fin»

¿Tais trabayando en nuevos temes?

Si, la verdá que durante l’añu pasáu tuvimos la suerte de tar bastante ocupaes ente conciertos y demás hestories dende que sacamos el discu y anduvimos muy centraes nello, ensin prácticamente tiempu material pa nin siquier pensar en facer coses nueves, anque ye cierto que somos un culu inquietu; nun nos gusta tar paraes y préstanos siempre tener idees rondando pela tiesta, asina que yá entamamos a mirar al futuru. A cortiu plazu, tenemos previsión de sacar durante esti añu material nuevu en forma de nueves collaboraciones, material audiovisual, etc… del que tovía nun se pue contar muncho. Too llegará. ¡Tái atentos a les nuestres redes sociales pa nun perdevos nada!

Mercar discos d’Algaire na tienda online