Tres del so estrenu’l pasáu 11 de mayu, esti domingu a les 21.45h remata la primer temporada de Xuntanza, el programa de la TPA dedicáu a la «música a traviés de quien la vive, la reinventa y la tresmite«. Los sones del Oriente asturianu van ser los protagonistes d’esti episodiu nun programa conducíu pola gaitera y cantadora Belén Arboleya y nel que va haber delles actuaciones.
Les persones venceyaes a la música de raigañu que van acompañar a Arboleya nesti capítulu son Santi Galguera del Grupu Etnográficu L’Oriente, los pandereteros Picos d’Europa y Juan Martín de l’Asociación Cultural ‘Cantu La Jorma’ xunto colos cantadores d’asturianada Cristina Sánchez y Manuel Roza Llera, amás d’otros músicos d’esta fastera del país.
Con esti sestu capítulu zárrase esti programa que tamién tuvo presentáu por Pau Santirso; Vicente Díaz; Héctor Braga, que fizo un especial dedicáu a l’asturianada; Esther Fonseca, con un episodiu enfotáu na mocedá; y Silvia Quesada, que presentó’l capítulu de los sones nel Occidente.
Suscríbite a les nuestres novedaes
