La selmana pasada presentáronse en redes sociales una formación nueva de música tradicional: NosOtrestres. Laura Ruiz, Mónica Vega y Candela Pidal, formen esti tríu centráu na música tradicional pal baille. Yá tienen el so primer trabayu grabáu, El son nos cantares de boda, y van presentalu en directo’l 10 d’abril en La Pola Siero dientro de la programación de la XLV Selmana del Folclor Astur.
«Conocímonos na Escuela de Música Tradicional de Fitoria, yo como mayestra y elles como alumnes, y pasín a pasu fuimos conectando y entamando a cantar xuntes n’estremaos eventos y con agrupaciones distintes«, desplica Laura Ruiz sobre l’orixe d’esti tríu nuevu nel que les trés canten y toquen la percusión tradicional pa facer un repertoriu tradicional nel que «si hai arreglos musicales, axústense a la estructura de los bailles». Amás, en dalgunes ocasiones, acompáñenles otros músicos: «por exemplu, el grupu De Cotía, al que pertenecemos, onde hai gaita, percusión y acordión».
«El nombre de NosOtrestres surde de la necesidá de poder identificanos a la hora de collaborar con otros proyectos musicales», comenta Ruiz destacando dalgunes de les vegaes qu’andecharon con otres formaciones y espectáculos: tocaron con bandes de gaites como les de Llariegu y El Gumial; cantaron en 2023 nel Festival Intercélticu de Lorient xunto al Grupu de Baille Tradicional Fitoria y a los músicos Daniel Álvarez y Julio Rodríguez; collaboraron nel homenaxe a Kepa Junkera con otres pandereteres de la península ibértica. «La última collaboración foi nel discu del llibru Del Asturias Patria querida y otras historias de Fernando de la Puente Hevia«, añade la vocalista y percusionista.
El 10 d’abril nel Auditoriu de La Pola Siero va ser la primer oportunidá pa ver a estes trés intérpretes en directo dientro de la XLV Selmana del Folclor Astur. Ellí van estrenar El son nos cantares de boda, un discu divulgativu que recueye cantares de boda antiguos y nel que suenen versiones tradicionales con percusión y voz; y otres más modernes, con otra instrumentación y collaboraciones. Amás Laura Ruiz sorraya que tienen «proyectos pa grabar más temes con collaboraciones«, asina ye como NosOtrestres nacen con puxu, fuercia y iniciativa pa siguir faciendo camín cola música del país.
Suscríbite a les nuestres novedaes
