El vigulín volvió a sentise en Piloña

L’Infiestu acoyó esti fin de selmana la tercera edición de les Xornaes del Vigulín Tradicional n’Asturies. L’eventu entamó’l vienres en La Benéfica cola conferencia Estudiando la música popular del siglo XVII: el Manuscrito de Salamanca, a cargo d’Ana Lombardía, musicóloga con delles publicaciones y artículos sobre la música pa vigulín nos manuscritos de los sieglos XVII y XVIII, y tamién sobre la tradición del vigulín n’Asturies. Na mesma conferencia, Ana interpretó dellos exemplos col vigulín, acompañada al buzuqui por Julio Rodríguez (Draque, Loína, Llan de Cubel). Tres ello, tuvo llugar el tradicional alcuentru de vigulineros y vigulineres d’Asturies, nel qu’añu tres añu van apaeciendo cares nueves, preba de que les xornaes animen a la xente a deprender l’instrumentu y a caltener un repertoriu y una tradición. Faciendo un corru, interprétense temes del repertoriu tradicional a mou de “inauguración” ente los músicos. 

El día remató na cervecería La Traviesa, onde se fizo la habitual sesión, a la que se sumaron otros músicos con flautes, guitarres y buzuqui, y na que se tocó una bona amuesa de repertoriu tradicional asturianu. Llamó l’atención un vigulín Stroh (nel que’l soníu sal per una bocina de metal paecía a la d’un gramófonu) que llevó ún de los asistentes. Tanto nel alcuentru como na sesión participó tamién xente de fuera d’Asturies, incluso llegaos d’Estaos Xuníos, que marquen esti fin de selmana nel calendariu pa facer una parada en Piloña y asistir a les Xornaes.

El sábadu, bien ceo, entamó nel CFP El Prial el cursu de vigulín alrodiu’l que xiren les xornaes, esti añu centráu nel vigulín dientro del folk asturianu. Tanto nel nivel d’aniciu como nel avanzáu trabayáronse delles pieces representatives del repertoriu, abordándose delles técniques y recursos estilísticos. Esti añu, los profesores foron Lisardo Prieto (Felpeyu, Dual, N’Arba, Llau, etc.) nel nivel d’aniciu y Dolfu R. Fernández (La Bandina’l Tombu, DRD, Aú?, etc.) nel avanzáu. A la par, dos pareyes de bombu y vigulín percorrieron L’Infiestu llevando la música pelos chigres, tanto nuna primera sesión matutina como n’otra al atapecer. Gala Cernadas (vigulín) xunto a Marco Zarabozo (bombu) y Juanjo Marqués (vigulín) con Daniel Lombas (tambor) foron los encargaos esti añu de da-y continuidá a esa formación tradicional que foi la más icónica de la tradición nel conceyu de Piloña.  

A lo llargo’l día, la reciella pudo disfrutar de dos actividaes como foron el conciertu Cantares de… y pa Neñ@s, de Fernando Valle Roso y Silvia Moreno y, pela tarde, unes olimpiaes tradicionales a cargu de Sergio Buelga. Un exemplu más del procuru por ufiertar unes xornaes atractives y prestoses pa toles edaes.

Pela tarde volvieron a xuntase los músicos asistentes pa facer otra sesión vigulinera nel Mesón Triana, y al cachu, a les 22h, entamaben los conciertos en La Benéfica. Alicornio, dúu formáu por Águeda Sastre (vigulín) y Carlos Martín (voz, guitarra y buzuqui), ufiertaron un repertoriu castellanu bien variáu, que prestó muncho, con pieces qu’Águeda desplicó brevemente p’animar a la xente a baillar. Zarró la nueche Llan de Cubel, con un conciertu mui aplaudíu, bailláu y disfrutáu, nel que destacó como momentu peculiar un tema tocáu a dúu por Simon Bradley (vigulín) y Xel Pereda (guitarra), Shelley’s Reel, mui llamativu técnica y estilísticamente, del que se sintió dicir que paecía otra clas más de vigulín d’esi segundu día.

Destacó a lo llargo de les xornaes la versatilidá y la utilidá d’esi nuevu espaciu que ye La Benéfica, y qu’esti añu s’emplegó pa dar agospiu a bona parte de les actividaes, tanto la conferencia, con fileres d’asientos, como les olimpiaes, los talleres de baille y los conciertos, que se disfrutaron nun espaciu simple, pero con encantu, con una barra pa la bebida con nome La Maléfica (mui irónicu) y guardáu de la lluvia del sábadu. 

Pa rematar, el domingu, al mediudía, hubo animación musical nes cais de L’Infiestu a manes de Los Gascones, y al empar, un taller de baille tradicional impartíu por Santi Galguera, de cuasi dos hores de duración, nes que se fizo repasu a una bona variedá de pasos y estructures del baille tradicional, mui bien desplicaos y atendiendo a les peculiaridaes de ca zona. Dempués del taller, un vermú en danza amenizáu polos músicos asistentes y polos propios Gascones, que decidieron prolongar ellí la so actuación, punxo fin a lo que yá se siente dicir que ye ún de los eventos más guapos de la escena musical tradicional asturiana.

Discos de folk a la venta na tienda