Tres la publicación del so primer discu, Memories de Deva, en toles plataformes dixitales va un par de selmanes, Guieldu asoleyen un formatu físicu que yá ta a la venta na tienda online de Musicasturiana.com. Trátase d’una jewel-box al estilu de la dómina de los 70-80’s que tanto-yos inspira. Sara Balsera ‘Solombra’ ye l’artista que diseñó l’arte de la portada y la contraportada, con una paisaxe marítimu, xabaz y lluminosu, inspiráu nes pintures romántiques. Per otru llau, Pablo Santamarta, baxista del grupu, encargóse de la maquetación enantes de la so fabricación na Factoría del Ruiu d’Avilés.
Memories de Deva son catorce temes que percuerren los soníos de raigañu del Arcu Atlánticu, amestándolo a otros estilos como’l folk progresivu, la new-age, el folk rock, el funk o’l smooth jazz. Un cuidáu trabayu qu’entemez temes de composición propia y d’orixe tradicional. Nél que suenen muñeires, dances, reels, xirandiyes, set irlandeses… Lo qu’ellos definen como «los soníos más tradicionales de los finisterres atlánticos d’Europa», poniendo especial enfotu n’Asturies y siendo Avilés el puntu de partida d’esti viaxe interceltista del que se pue conocer más nel llibretu del formatu físicu. Pero hai más muncho que tradición; como ellos bien despliquen, allóñense «del minimalismu imperante» qu’hai na escena sonora y siete músicos y milenta instrumentos dan forma a unos temes nos que tamién suena «la electrónica con aires retro, la fuercia del rock, el groove del funk, les pincelaes sincopaez del jazz y la sofisticación de la música progresiva».
El trabayu cocinóse sele nos Estudios 15:40. Foi un procesu de cuatro años dende qu’Héctor Aneiros (whistles irlandeses, ocarines, flauta contraltu, gaita electrónica, bombarda bretona, voz, coros y programaciones); Susana Sors (voz, coros y guitarra acústica); Carmen Tomé (vigulín); Jorge Álvarez (bouzuki irlandés, guitarra eléctrica y mandolina); Laura Méndez (sintetizadores y coros); Pablo Santamarta (baxu eléctricu, didgeridoo) y Rubén Cadenas (batería y multipad); entraron a grabar el so primer cenciellu hasta qu’agora pue sentise’l resultáu completu. Nesti tiempu Luis Senén foi’l técnicu de soníu, responsable de la mezcla y máster; Aneiros el productor; y xunto a ellos andecharon les componentes de 6 Riales a les voces y percusiones tradicionales; Pepín de Muñalén al saxofón; Celia Nieto y Olaya Pérez al vigulín; y Jesús del Castillo na gaita electrónica.
Ayeri, el café Trisquel acoyó al grupu dende les 20h pa la presentación de Memories de Deva a la manera de les audiciones comentaes qu’había en Xixón va delles décades. La historiadora Arantza Margolles presentó l’actu nel que, amás de sentise’l discu, el grupu pudo desplicar detalles sobre’l procesu creativu.
Tres de pisar escenarios tan destacaos como’l Festival Intercéltico de Sendim (Portugal), Festival Internacional do Mundo Celta de Ortigueira o’l Festival Celta Internacional Reinu de Llión; el grupu yá tien les primeres feches confirmaes onde van sonar los temes de Memories de Deva: mañana, 5 d’abril na Folixa na Primavera (Mieres); 10 de mayu nel Válgame Fest (Cabrales) y 20 de xunu nel Folkomillas (Cantabria). Cola publicación d’esti discu, la música asturiana vuelve a averase a les sonoridaes más celtes, amosando que sigue habiendo relevu, interés y bon facer ente les xeneraciones más nueves.
Suscríbite a les nuestres novedaes
