Los díes 14, 15 y 16 d’abril Xixón va acoyer la tercer edición de Música en Rede, alcuentru profesional de la industria musical qu’entama la Conseyería de Cultura, Política Llingüística y Deporte a traviés de Cultura en Rede. La organización anuncia les ubicaciones y horarios de los showcases y fai un avance de les primeres charres, meses redondes y talleres que va haber nestes xornaes qu’esti añu aporten con novedaes nel so formatu. Tamién ábrese’l plazu d’inscripción pa participar nes xornaes.
Los conciertos rellacionaos cola música n’asturianu van ser Tania Pereira (14 d’abril a les 19h na sala Albéniz); el 15 d’abril La ciudá nel mar (19h na sala Albéniz), Asturiana Mining company (20h na sala Acapulco) y Rubén Alba Band (21h na sala Albéniz); y el xueves 16 Entós (12.45h na Ilesia de la Llaboral) y Rubén Bada (18h nes Cocines Vieyes de La Llaboral). Tamién actúen Pablo Valdés Trío, Tuya, Antonio Irún y los Lobos, Tino Di Geraldo Quartet y Los Míticos del Chimborazo, amás de la mítica formación escocesa Capercaillie. Asina ye como nueves ubicaciones -les sales de conciertos xixoneses y espacios singulares de La Llaboral- y l’actuación d’un grupu internacional rescamplen ente les novedaes.
Xunto a la música en directo, Música en Rede vuelve poner el focu nos retos del sector. Va haber cuatro meses redondes de debate dedicaes a cuestiones como la igualdá na industria musical, cola participación de Lara Alcázar (Asociación MIM) y Fee Reega, con moderación de Sofía Castañón; el pasu del aula al escenariu, con Anxo Pintos (ETRAD) y Mario Carrillo (Escuela Música Creativa), con moderación de Rodrigo Joglar; o’l diálogu ente lo tradicional y lo contemporáneo, onde Marcos García modera l’alderique ente Xosé Ambás, Leticia Baselgas y Ferla Megía.
Tamién va haber una sesión específica sobre internacionalización onde van participar los organismos del Principáu d’Asturies d’esportación comercial, Asturex, y l’Axencia de Ciencia, Competitividá Empresarial y Innovación Asturiana, Sekuens. Igualmente van celebrase dos alcuentros comerciales ente profesionales, pensaos pa facilitar contactos y abrir víes de collaboración nueves.
El programa complétase con cuatro talleres prácticos y sesiones formatives centraos n’aspectos clave pa la profesionalización; la xestión de derechos musicales, con Inés Cardero (AEDEM) y Miguel Diéguez (SGAE); la movilidá internacional na industria, con Beatriz Ortega (ES Música); o’l curiáu de la salú física y mental nel ámbitu artísticu, con Rosana Corbacho y Amaia Carnicer.
El ramu d’esta edición de Música en Rede va tar marcáu pol conciertu de la banda escocesa Capercaillie, una de les formaciones más reconocíes de la escena celta internacional, que va actuar el 16 d’abril nel Teatru de la Llaboral. «La so presencia ayuda a reforciar el calter abiertu y conectáu de la muestra y asitia a Asturies nel circuitu de referencia de la música de raíz atlántica«, declaren dende la Conseyería de Cultura, Política Llingüística y Deporte na nota prensa unviada p’anunciar l’alcuentru
Suscríbite a les nuestres novedaes
