L’axenda musical asturiana vien enllena esti fin de selmana con conciertos y otres propuestes culturales que se van desenvolver en Xixón, Llangréu, Piloña, Grau, Carreño, Mieres, Uviéu, Teberga y Ayer. Dende actuaciones solidaries hasta festivales de Navidá y conciertos en sales, la música va ser protagonista nos díes previos a les fiestes. Tola información pue vese nesta imaxe, na Axenda de musicasturiana.com y nes distintes noticies publicaes.
La programación arranca’l vienres pela tarde col Conciertu Solidariu Villa de Xixón, que va celebrase a les 19.30 hores na Plaza’l Parchís. Nel eventu participen diverses agrupaciones musicales y la recaldación va destinada al Bancu d’Alimentos d’Asturies. La mesma nueche, La Felguera acueye’l Conciertu de Navidá d’A Mansalva nel Teatru José León Delestal, a partir de les 20 hores, col alumnáu de la escuela de música, que va ufrir un repertoriu variáu con instrumentos tradicionales y actuales. Tamién actúen Soi Panderetera en Caborana.
Per otru llau, L’Infiestu acueye la inauguración de La Maléfica, chigre cultural venceyáu a La Benéfica. Nel actu va haber dende les ocho la tarde tonada, cantares de chigre, sopes d’ayu y la organización anima al públicu a que traiga instrumentos pa baillar y celebrar xuntes esti espaciu nuevu.
El sábadu presenta una programación bayurosa y diversa. En Grau, los Aguilandeiros de San Xuan de Villapañada van percorrer la parroquia dende les diez de la mañana y a les 15h actúen la Bandina Los Collaínos.
Pela mañana y al mediudía, la música tradicional va sonar en distintos puntos: en Candás, la Plaza La Baragaña va acoyer un Bailla na Plaza solidariu entamáu por San Félix; en L’Infiestu, el Vermutazu entre Pegollos va combinar conciertos y DJs en La Benéfica; y en Xixón, el Grupu Folklóricu Trebeyu va actuar nel LABoral Centru d’Arte y Creación Industrial, dientro del LABshop
Yá pela tarde, l’Auditoriu Teodoro Cuesta de Mieres va ser escenariu del estrenu de Diarios d’Ampudia espectáculu de Prau Llerón qu’entemez música, artes escéniques y audiovisuales. Pela nueche, Les Pites van actuar n’Uviéu, na sala Lata de Zinc; mentes que Rollu Folk actúen na Taberna Narciso de Teberga.
El fin de selmana musical va zarrase’l domingu con propuestes familiares y participatives. A les 12:00 hores, LABoral de Xixón va acoyer un taller y recital de pandereta a cargu de les Pandereteras de Somiedo. A la mesma hora, en Morea (Ayer), el Teatru Cine Carmen va ser l’escenariu del Festival de Navidá d’El Gumial, nel que va participar l’alumnáu d’esta Escuela de Música Tradicional. Por último, Carlos Velasco & Chino El Indio acompañaos de Dani Álvarez toquen na Madreñada (Plaza’l Paragües, Uviéu, a les 13h) l’Auditoriu As Quintas acueye l’estrenu a les 18h de la película A Cantinera.
Suscríbite a les nuestres novedaes
