El pasáu 29 d’abril estrenóse nel teatru nacional de Poitiers (Occitania), la puesta n’escena de la residencia artística del proyectu ArC AtlantiC – Dérives sonores. Trátase d’una iniciativa entamada pola orquesta de música contemporánea más importante de Francia, Ars Nova, y pol músicu Romain Baudoin col oxetivu d’esplorar la diversidá d’influencies y identidaes culturales del Arcu Atlánticu. Ente elles suena Asturies, representada por Clara Diez Márquez, cantante y panderetera, fundadora de Muga y residente dende hai años en Bretaña.
«Ye la narración sonora d’un viaxe pel golfu de Gascoña. El puntu de partida nun s’anuncia, cada cual entama’l viaxe onde-y paeza. Nesti viaxe vívense tempestaes, momentos de calma n’alta mar, avistamientos de tierres y siéntense siete llingües –bretón, gallo, poitevin, gascón, euskera, asturianu y gallegu– y timbres de voz diferentes. A vegaes son voces clares, a vegaes améstense … y la orquesta acompaña con testures sonores, drones y improvisaciones«, desplica Diez al rodiu’l conteníu d’esti espectáculu nel que participen ocho cantantes y instrumentistes de cada territoriu del Arcu Atlánticu.
L’artista d’Amieva valora que «l’estrenu foi mui bien, el públicu emocionóse y nós tamién, porque ye un conciertu con muncha carga simbólica» y nagua por «poder representalo n’Asturies». Pel momentu tienen «dos feches confirmaes pa 2027: en Baiona (País Vascu Norte) y París» y tán zarrando otres notros territorios venceyaos a lo que Diez define como «un proyectu grande, con 17 artistes nel escenariu y cuatro técnicos, amás del equipu de producción».
Faustine Audebert y Emmanuelle Bouthillier (Bretaña), Perrine Vrignault (Poitou), Maud Herrera (Gascoña), Maider Martineau Zubieta (País Vascu), Soltxu (Cantabria) y Fransy González (Galicia) acompañen a Clara Diez nesta obra na qu’amás de cantar, les ocho músiques formen parte de la orquesta porque toquen toes «instrumentos como la alboka, pandereta, vigulín o guitarra eléctrica«. Gracies a ArC AtlantiC – Dérives sonores, Asturies sigue enachando llazos con otres cultures del mundu a traviés de la creación musical.
Suscríbite a les nuestres novedaes
