Vuelve Héctor Braga dempués de dos años ensin asoleyar material discográficu. El so single nuevu, «Llobatu«, yá se pue sentir en toles plataformes musicales y aporta amás acompañáu d’un videoclip dirixíu por Titi Muñoz. Ye un amiestu de danza y romance, con toques electrónicos y una potente base rítmica que convierte a esti cantar nuna pieza pegadiza. La lletra, obra del propiu Braga, ta inspirada nuna lleenda y pa la música collaboró’l productor Javier Blanco a la composición, los teclaos y les programaciones; andechó Hevia; Paul Balmori y Rigu Suárez de Baxel y Corquiéu grabaron whistles; Algaire fixeron ixuxús y glayíos; y Simón Sanjosé metió percusiones.
«Esti cantar amuesa la maxa d’una d’eses lleendes cuntaes mientres xeneraciones alredor de les fogueres nos calecíos llares del iviernu asturianu: un guaḥe mui revoltosu ye maldecíu por so ma. Pola mor del embruxu el rapaz conviértese en llobatu y pasa siete años analayando pelos montes hasta que fina’l conxuru y pue tornar sanu y salvu pa casa. Sicasí, yá nunca nun escaecerá esi llau salvaxe que toos tenemos y qu’elli vivió fondamente…», comenta Héctor Braga nel so Instagram pa presentar el single. Al testu acompáñenlu delles ilustraciones de Vítor González, que va poner imáxenes a más cantares del próximu discu d’esti reputáu músicu.
El primer adelantu del siguiente álbum d’Héctor Braga aporta tamién en formatu audiovisual. La llocalidá d’Inguanzo (Cabrales) ye l’escenariu d’esta historia a la que’l prestixosu director de videoclips Titi Muñoz pon-y imáxenes y que ta protagonizada por Nacho Moradiellos, Martín Huerdo, Lola Inguanzo y Alfonso Aguirre. Toa una apuesta per parte d’esti multiinstrumentista que fai medrar les espectatives alredor del so próximu trabayu,
Suscríbite a les nuestres novedaes
