Bones tardes. Quixere que les mios primeres palabres fueren n’agradecimientu a l’Asociación Grana pol so llabor de memoria d’una figura como la de Yolanda Huergo, la nuestra Yoli, a la que tanto echamos de menos como amiga y como activista, con una vida exemplar de compromisu coles causes más nobles, d’equí y de fuera. Gracies tamién al xuráu que quixo valorar como merecedora d’esti premiu la mio obra. Munches gracies por arriesgar, por salise de la norma, y premiar un trabayu que nun se correspuende colo avezao nun ensayu, qu’entemez estilos y temátiques, que pasa de lo local a lo universal ensin solución de continuidá, qu’interconecta realidaes alloñaes pero con situaciones asemeyaes, que descubre cómo lo asocedío a miles de kilometros d’Asturies puede tener reflexu nella.
¡Da-yos caña! El tiempu y el contestu d’una banda de Rock Astur, títulu de la obra gallardonada, axunta campos lliterarios y temáticos estremaos: historia, política, música o biografía danse la mano nun testu que se centra nes circunstancies y socedíos más importantes a nivel asturianu y internacional, que posibilitaron el surdimientu d’un grupu como Dixebra nuna ciudá como Avilés. Trátense temes como la crisis del petróleu de 1973, la transición política nel Estáu español, la reconversión industrial, l’asturianismu modernu, el nacionalitarismu llibertariu, el movimientu punk, la música celta, la comunicación alternativa… acutando la última parte pa falar de les principales característiques de la banda: mestizaxe musical, repercusión pública, reivindicación llingüística, rellaciones lliteraries, obrerismu temáticu, ente otres. Tóquense cuestiones de calter históricu, social, cultural o llingüisticu, entellazaes con anécdotes rellacionaes con Dixebra o referencies biográfiques.
«Conocer los principales fechos que dieron forma a l’actualidá y el devenir cotidianu n’aspectos como’l políticu, el cultural o’l social, ye daqué imprescindible pa comprender dafechu porqué se dieron eses escenes sonores nuna dómina determinada»
Como escribo nel Entamu d’esta obra: «Estilos y corrientes musicales como’l blues, el punk, el Nuevu Canciu Astur o’l Rock Radical Vascu, por poner namás dellos exemplos, nun s’entienden nin podríen dase ensin tener en cuenta’l contestu histórico-social concretu que los arrodió. Conocer los principales fechos que dieron forma a l’actualidá y el devenir cotidianu n’aspectos como’l políticu, el cultural o’l social, ye daqué imprescindible pa comprender dafechu porqué se dieron eses escenes sonores nuna dómina determinada. Nel casu concretu d’Asturies, momentos y acontecimientos históricos como la muerte del dictador Franco y la llamada Transición, el redescubrimientu del celtismu, el surdimientu del asturianismu modernu o la conocida como reconversión industrial, tuvieron un reflexu musical que ta detrás de la formación de movimientos como’l Nuevu Canciu, el folk llariegu contemporáneu o’l rock astur. Conocer fondamente los sos contestos va posibilitanos descubrir les claves d’estes escenes sonores». Nesi sen, como dicimos, tener conocencia de la crisis del petróleu nos años 70, de la restauración monárquica, de la llegada de la democracia formal, del nacimientu del asturianismu contemporáneu, de la reestructuración del sector industrial, de la llegada del punk, de los medios alternativos de comunicación, del descubrimientu del nacionalitarismu llibertariu, del impactu de les drogues, del ambiente urbanu, de los conflictos llaborales, de la instauración del réxime autonómicu, del procesu de normativización del asturianu… va danos les claves de los porqués surde una formación musical como Dixebra y qué repercusión va tener too ello na so ideoloxía y mensaxe.
«Quiero creyer que nun ye un exerciciu de señardá vacíu, saber d’au venimos va facilitanos conocenos meyor a unes xeneraciones de les clases populares y trabayadores asturianes marcaes y moldeaes por unos fechos concretos de la historia recién. Sicasí, nun m’escuendo, detrás de la visión qu’asoleyo nel testu hai ideoloxía, claro que la hai, soi productu de tolo que falo nél y tomé partíu pol asturianismu, dalgo que va permear tola mio vida y pensamientu»
Quiero creyer que nun ye un exerciciu de señardá vacíu, saber d’au venimos va facilitanos conocenos meyor a unes xeneraciones de les clases populares y trabayadores asturianes marcaes y moldeaes por unos fechos concretos de la historia recién. Al empar, les nueves xeneraciones van tener la oportunidá de ser conscientes de por qué vivimos nuna sociedá coles característiques como la nuestra. Sicasí, nun m’escuendo, detrás de la visión qu’asoleyo nel testu hai ideoloxía, claro que la hai, soi productu de tolo que falo nél y tomé partíu pol asturianismu, dalgo que va permear tola mio vida y pensamientu.
«Quiero reivindicar equí’l llabor d’unes persones que rompieron —rompimos— cola visión curtia y reducida qu’una parte del asturianismu tenía sobre l’asturianidá en sí mesma, amenorgándola a parámetros rurales esclusivamente y basada únicamente na tradición»
Otra manera, quiero reivindicar equí’l llabor d’unes persones que rompieron —rompimos— cola visión curtia y reducida qu’una parte del asturianismu tenía sobre l’asturianidá en sí mesma, amenorgándola a parámetros rurales esclusivamente y basada únicamente na tradición; como, otra vuelta, digo nel testu: «lleguemos a la conclusión de que‘l rock podía contribuyir a innovar una identidá asturiana non esencialista; la música (y por estensión la cultura) asturiana tenía qu’abrise dende una visión más zarrada sobre lo tradicional (o entendío como tal) hacia una conexón con otres cultures populares universales. Tenía qu’almitir qu’otres producciones culturales son tamién parte de la cultura nacional asturiana, eso sí, siempre cola primacía vertebradora de les nuestres llingües propies: l’asturianu y el gallego-asturianu». Nomes como’l del gran catalizador avilesín Miguel Solís Santos —creador de sinerxes ente toos nós—, Adolfo Camilo Díaz, César Maniegu, Xosé Nel Riesgo, Floro González, Choni Álvarez, Xuacu Valdés, Xelu González Morán, Tina Cuadriello, Santiago Díaz, Rubén Arias, Vitor Álvarez, Antón Barquero, Damián Barreiro, Susana Sela, Xosé Nel Comba, Llinu Álvare… toos ellos d’Avilés y provenientes de campos como la lliteratura, la música, la filoloxía, el periodismu o l’activismu.
«Pido a la Conseyería de Cultura del Gobiernu d’Asturies que declare a Damián Barreiro, maestru nel ensayu asturianu, protagonista de la edición de la Selmana de les Lletres del añu 2028»
Nun quiero acabar ensin facer alcordanza de tres persones importantes na concepción d’esta obra: Xicu Ariza por afalame y tar siempre ehí, Rubén Vega polos sos conseyos y Damián Barreiro por ser el primer llector y inspirame col so llabor. Esti últimu, como Yolanda, dexábanos ceo, mui ceo y mui incomprensible y inxustamente; maestru nel ensayu asturianu, un xéneru que vive ún de los sos meyores momentos creativos y d’incidencia social. Pal que pido a la Conseyería de Cultura del Gobiernu d’Asturies que lu declare protagonista de la edición de la Selmana de les Lletres del añu 2028, tomando como figura central y dedicándo-yla a Damián. Remato reiterando les gracies a l’Asociación Grana y espresando l’allegría y l’honor que ye pa min el qu’una obra mía lleve’l nome de Yolanda Huergo.
Semeya cedida pola asociación Grana, n’Alcordanza de Yolanda Huergo.
Suscríbite a les nuestres novedaes
