Ayeri la Banda Gaites Castrillón asoleyó un comunicáu pente’l que daba anuncia del retrasu de dellos proyectos como l’Alcuentru de Bandes de Gaites que diba celebrase’l viniente 28 de xunu y qu’organicen dende va venti años por mor de la falta de pagu d’una parte de la subvención que l’Ayuntamientu de Castrillón-y concedió en 2024 y la falta de noticies sobre la correspondiente a 2025. Na so denuncia pública, la Banda Gaites Castrillón quixo dar cuenta de les dificultaes económiques que vienen sofriendo dende va dos años, cuando entamaron los problemes pa recibir el sofitu que’l Conceyu -anguaño encabezáu pol alcalde del PP Jesús Eloy Alonso Prieto- lleva apurriendo dende 2002, acordáu nun conveniu de collaboración ente l’asociación y la institución entá vixente que nun se ta cumpliendo en tiempu y forma.
«Nel momentu en que se robla esti escritu, siguimos pendientes de que se nos apurra dafechu la subvención de 2024, magar que les factures y xustificaciones pertinentes lleven presentaes dende’l pasáu 28 de payares y el pagu yá s’aprobara per parte del Consistoriu. A esto súmase que nun se concretó fecha nenguna pal abonu de la cantidá que correspondería a 2025, y que too paez indicar que la espera puede midise en meses, en demasiaos meses, p’asegurar el normal funcionamientu del colectivu«, afirmen.
Esta situación, que yá se diera’l branu pasáu, ye una torga que, según les sos pallabres, tamién tán sofriendo otres asociaciones de Castrillón. Poro, llamen a texer rede pa facer frente a les trabes del Ayuntamientu, del qu’esperen «que pongan tol so enfotu en correxir esti desafortunáu planteamientu que namái conduz a un amenorgamientu de les actividaes que los colectivos lluchamos por sacar alantre nel nuesu conceyu«.
Suscríbite a les nuestres novedaes
