La Banda Gaites El Gumial ta acabante d’anunciar que va llanzar el so primer discu, Aire na rampla. El 26 de xunu presenten un trabayu col que quieren «caltener y esparder la música tradicional ayerana y asturiana» y que van editar en formatu físicu y dixital. Pa facelo posible, entamen una campaña de micromecenalgu en Verkami cola que poder algamar los 5.000 euros colos qu’asumir tolos costos.
«Queremos crear un trabayu que recueya tolo deprendío, vivío y compartío estos años. Un discu que represente la nuestra evolución musical y que quede siempre como memoria d’esti camín que llevamos andao. Porque un primer discu nun ye namás una grabación: ye identidá, ye memoria y una forma d’amosar al mundu quién somos y qué sentimos a traviés de la nuestra música», anuncia El Gumial nel testu de presentación del micromecenalgu.
D’esta manera, la formación ayerana va rexistrar delles de les pieces del so repertoriu pa «crear un discu que nun seya namás música, sinón tamién una heriede pequeña pa la música tradicional asturiana«. Precisamente, «Un soníu que permanez» ye’l nome de la campaña de micromecenalgu, que reflexa perbién la so intención d’esparder los sones de raigañu que viven «con pasión».
Pa facelo posible, El Gumial tien que cubrir tolos costos de grabación, producción, mezcla y masterización del discu, amás de la fabricación física, el diseñu gráficu, el material promocional y la producción audiovisual asociada al proyectu. Cifren en 5.000 euros el proyectu y la xente pue sofitalos faciendo aportaciones que van dende los 15 euros hasta los 250 euros. El discu, camisetes del FolkAyer -festival qu’organicen-, botelles de sidra y de cerveza y una actuación privada d’una pareya de gaita y tambor, son dalgunes de les recompenses qu’ufren.
La Banda Gaites El Gumial ye tamién impulsora del festival FolkAyer, una cita que se consolidó nos últimos años como una de les referencies del folk n’Asturies y qu’esti añu anunció yá nomes tan destacaos como José Ángel Hevia, Malin Lewis, Rubén Alba y el Grupu Etnográficu L’Oriente. Ye nesti eventu onde van presentar en directo’l trabayu el vienres 26 de xunetu a les 22.30h y onde van entregar les recompenses del micromecenalgu que faiga posible un discu que, nes sos pallabres, «representa un suaño colectivu construyíu con esfuerciu, ilusión y muchísimes hores de trabayu compartíu».
Suscríbite a les nuestres novedaes
