2025 foi un gran añu pa la música asturiana y despídise amosando la fuercia que tien esta escena y como dalgunes de les sos propuestes que lleguen a cada vez más públicos. Per un llau, Gaiteros del Carbón anuncia que yá agotó les entraes de los dos pases pal conciertu X Aniversariu que van facer el 10 de xineru nel Teatru José León Delestal de La Felguera (Llangréu); pel otru, Rodrigo Cuevas yá vendió too pal arranque de xira de La Belleza del 24 d’abril nel Pabellón de La Magdalena d’Avilés y anuncia una segunda fecha pal sábadu 25.
La banda de gaites de les cuenques mineres Gaiteros del Carbón van festexar con munchu puxu los sos diez primeros años de camín. Tres d’algamar una exitosa campaña de crowdfunding pa financiar los actos del X Aniversariu y d’agotar toles entraes en malpenes una selmana pal pase de les 20.30h; yá vendieron too pal segundu pase que van dar a les 17.30h d’esi 10 de xineru. Nel espectáculu van collaborar artistes pernomaos: Hevia, Nuberu, José Manuel Tejedor, Xune Elipe (Dixebra), Marisa Valle Roso, Víctor Manuel y Celtas Cortos. Amás, tamién van tar acompañaos por trés músicos asturianos de reconocíu prestixu: Rubén Bada (guitarres), Juanjo Díaz (batería y percusiones) y Ramón Prada (teclaos y baxu), que se va encargar, xunto col director de la banda Pablo Carrera, de los arreglos y la dirección musical.
D’otra banda, Rodrigo Cuevas tamién vendió en menos d’una selmana les 4.500 entraes pal primer conciertu de la xira La Belleza. «Por petición popular» -como anunció nes sos redes sociales- el ministru de verbenes y El Cohete Internacional -la so oficina de contratación- yá pusieron a la venta les entraes pa una segunda fecha nel Pabellón de La Magdalena d’Avilés: el sábadu 25 d’abril a les 21.30h.
Suscríbite a les nuestres novedaes
