Dende va más de dos décades, Asturies tien una llexislación qu’afecta negativamente a la programación de música en vivo en chigres y otros llocales. La Llei 8/2002, de 21 d’ochobre, d’Espectáculos Públicos y Actividaes Recreatives lleva años pendiente de reformase pero, mentanto nun llega esi día, l’Ayuntamienu de Xixón foi pineru n’implantar Siente Xixón, una iniciativa que facilitaba la programación de música en vivo y otres manifestaciones artístiques… hasta qu’aportó una denuncia de l’asociación Asturias de Noche y esti añu’l programa quedó paralizáu. La respuesta tamién llegó: Unidos por la cultura en Asturias.
Una petición en Change.org -que yá lleva más de 1.200 firmes– y la publicación d’un manifiestu que «busca reunir a tolos empresarios d’hostelería, músicos, y artistes pa dar forma a una rede sólida, collaborativa y caltenible que potencie la cultura n’Asturies«. Son los primeros pasos d’esta iniciativa que quier «protexer y promover la música en directo, garantizar alcuerdos xustos entre llocales y artistes, y ufrir una esperiencia cultural arriquecedora«.
D’esta manera, Unidos por la cultura en Asturias busca non retrucar namás a la denuncia interpuesta por Asturias de Noche que caltién bloqueada la convocatoria d’esti añu de Siente Xixón. Tamién quier trabayar por camudar la llexislación asturiana nesti sen porque, como argumenten, «la música en vivo nun ye namás entretenimientu; ye una parte fundamental de la nuestra identidá«.
«Los bares, restaurantes y pubs foron durante muncho tiempu l’abellugu d’artistes emerxentes y consagraos, creando un espaciu únicu d’espresión y disfrute», plantega’l manifiestu que llama a que «toos tean allineaos, remando na mesma dirección» pa que la rueda de la cultura «siga xirando». Asina ye como la plataforma nagua por axuntar esfuerzos ente hostelería y artistes pa valtar les intenciones d’otra parte de la hostelería agrupada al rodiu de l’asociación Asturias de Noche.
Suscríbite a les nuestres novedaes
