El vienres 10 d’abril diose en La Pola una estrena doble de música asturiana; la presentación de “El Son nos cantares de Boda vol. I” del grupu nosOtrestres nel Teatru-Auditoriu de la villa, como parte de la Selmana del Folclor Astur del G.F.I. Ventolín, y el primer conciertu del gran combu Cuévano na taberna homónima. Dos espectáculos, de primeres alloñaos, xuníos pola necesidá y l’oxetivu de cellebrar la vida y los venceyamientos que nos caltienen.
“- ¿Fuisti feliz güela? -La felicidá nun ye un día neña, ye un camín con cuestes y con llanos, pero aquel día entamó una canción que entá güei puedo escuchar”; esta conversación güela-nieta, foi el filu conductor del conciertu conceptual de nosOtrestres. El grupu formáu por Laura Ruiz, Mónica Vega y Candela Pidal, recreó con ciñu’l viaxe sentimental d’una novia’l día del so casoriu al traviés del repertoriu musical asturllionés. Con una puesta n’escena y una iluminación curiada con mimu, cada arreglu presentáu, siempres precedíu d’un fragmentu curtiu de la grabación orixinal, diba faciéndonos transitar al traviés d’esta esperiencia mientres nel telón de fondu pasaben semeyes de boda de madres y güeles cedíes pol públicu.
Cola llegada de les compañeres a la casa de la novia y la puesta de les mantilles del traxe tradicional, entamó’l camín a la ilesia acompañáu por Fitiriteres (Fitoria) y les Pandereteres L’Algara (Villaviciosa).
El viaxe continuó de la mano de Fernando de la Puente, quien nel so discursu reconoció nesti espectáculu’l frutu del so trabayu, la materialización d’una idega que quixo dar a lluz coles blimes del ciclu de la so propia vida como investigador y docente. Fernando faló d’esti discu, “El Son nos cantares de Boda vol. I”, como’l piesllu d’un círculu qu’entamó de la mano de Laura Ruiz, alumna suya y a la vez mayestra de les otres dos integrantes de nosOtrestres. De la Puente, aprovechó tamién l’espaciu p’agradecer la humanidá y xenerosidá de Ludivina López López, informante de la que pudo deprender la mayoría de los cantares presentes nesti proyectu.
El grupu formáu por Laura Ruiz, Mónica Vega y Candela Pidal, recreó con ciñu’l viaxe sentimental d’una novia’l día del so casoriu al traviés del repertoriu musical asturllionés
Yá na salida del templu, acompañaron a nosOtrestres nos «Cantares al padrino» el grupo Los Gascones; dando pasu a la parte quiciabes más profunda del espectáculu na que se percorrió l’impactu psicolóxicu pa la muyer, dientro de la llóxica de la familia troncal tradicional, que supón abandonar la casa na que crecisti y dexar de ser fía pa ser nuera y esposa. Nel arreglu de la melodía d’Abelgas de Luna pa «La llegada a la casa nueva», participaron los músicos Luis Senén Fernández a la guitarra y Susana de la Cruz a la flauta.
L’espectáculu foi rematando con una «Propina a las Cantadoras», acompañaes por Nel Sánchez y Arsenio Ruíz, pa seguir cola «Despedida a las Compañeras», na que reiteraron la importancia de los cuidaos y los vínculos d’amistá. Un reconocimientu estendíu nel cantar «Tributo a Pandereteres de Fitoria«, nel que, acompañaes d’esta agrupación, aprovecharon pa recordar a la so compañera desapaecida, Silvia.
L’ultimu tema d’esti espectáculu “El Son nos cantares de Boda vol. I” y l’únicu de la zona oriental foi “La Buena Pro”; nun arreglu polifónicu especialmente esixente sustentáu poles cuerdes de Senén Fernández. Tolos convidaos tornaron al escenariu pal bis reclamáu pol públicu, nun agarráu que punxo en pie y en movimientu al Auditoriu de La Pola.
Les muestres d’amor nun se llimitaron al Auditoriu, a les poques hores, nel Cuévano, materializábase’l frutu que solo pue dar un llocal comprometíu cola música y la cultura en xeneral. Na semana na que paez que volvemos a tar a vueltes cola modificación na Llei d’Espectáculos, presentase nun d’estos espacios una superbanda, esencialmente plural y profundamente ecléctica muestra del impulsu perimportante pa la música en directo n’Asturies que suponen y siempre supunxeron los chigres.
Nel Cuévano, materializábase’l frutu que solo pue dar un llocal comprometíu cola música… una superbanda, esencialmente plural y profundamente ecléctica muestra del impulsu perimportante pa la música en directo n’Asturies que suponen y siempre supunxeron los chigres.
Cuévano, amás del espaciu, la Taberna, ye’l nome d’esta banda formada por Carlos Velasco y Alicia Villanueva como voces principales; Xuacu Amieva a la gaita; Julio Rodríguez al bouzuki y vigulín; José Alfredo Cordero, Maje Llames, Leti Cienfuegos y Alba Cuadra como coristes; Dani Álvarez como multiinstrumentista; Chino «El Indio» a la guitarra; Simón San José a la percusión; Alex Petu al baxu y Iván Testón como lletrista y alma d’esti proyectu.
“Esta nueche, Cuévano ye regalu, ye’l nacimientu d’un proyectu enxendráu nesta casa y que ye reflexu y espeyu de tolo que aquí vivimos nes nueches de vinu y roses. La esperanza de creyer, que toles pallabres pueden tornarse en realidad y el convencimientu de que cualquier suañu ye posible” con estes pallabres del alma máter del grupu, entamaba la presentación de Cuévano, un grupu qu’entiende que “cada voz tien el so tonu y que la xuntanza simplemente fai música más melódica”. Una idega de pluralidá que se fixo soníu de mestura, en forma de tonaes-pop y ritmos rockabilly sobre melodíes populares, en versiones de grupos conocíos y temes propios. La espectación y l’esitu de convocatoria pa conocer el frutu d’esta filosofía foi tal que más de la metá del públicu tuvo qu’escuchar el conciertu dende fuera de la Taberna.
Nuna banda con tantos nomes, les presentaciones tornáronse centrales; alternativamente dalgunos miembros del públicu, parte esencial tamién d’esti universu del Cuévano, diben presentando a caún de los integrantes de la banda; escucháronse asina audios de güeles, amigues y fíos de los músicos, nuna muestra más de complicidá y de reflexón pa cola rede que nos caltién.
Ente les tonaes a dúo y los clásicos de chigre, hebo espaciu temién pa les reivindicaciones polítiques con un tema dedicáu a la resistencia de los vecinos de Tañes énte’l naufraxu del so valle o la musicalización d’un poema d’Albino Suárez alredor de la represión franquista.
Unu de los temes más aplaudíos de la nueche foi ensin dulda “Tomillo salvaje de la montaña” una torna al asturianu y versión de José Martínez Álvarez (Ún de Grau) del perconocíu esitu “Wild Mountain Thyme” del grupu escocés Tannahill Weavers.
Una muestra más de complicidá y de reflexón pa cola rede que nos caltién
La nueche peslló colos temes “Qué fue de aquel Asturianu” y “L‘Altu Nalón”, esta última sobre melodía de la «Marcha Brañes», pa los que pidieron la collaboración del públicu repartiendo copies de les lletres.
Si Cuévano ye l’espaciu, tamién ye’l valor de la escucha y l’acompañamientu, ye facer música y esfrute de lo rutinario; ye tamién reflexonar sobre los cambeos nos ciclos y especialmente dexase acompañar nellos y ye, a la fin, l’amor que se celebró nes dos estrenes de La Pola.
Suscríbite a les nuestres novedaes
