El grupu de mecigayu ska La Tarrancha asoleyó esti pasáu vienres 13 de setiembre’l videoclip «Pela carretera«, un cantar inspiráu na melodía popular klezmer «Odessa Bulgar» y nel que collabora Pepín de Muñalén al vigulín. El tema fusiona los aires folk del Este col punk y el rap, y la lletra fala, como diz la banda, «de la carretera, de lo bono de conocer otros llugares, de conocer otres bandes, otres persones, de compartir otros manteles y de celebralo con daqué tan importante como ye la música en direuto».
«Pela carretera», que va tar ceo disponible n’audiu nes plataformes musicales, foi grabáu y masterizáu en Tutu Estudios pol productor Sergio Rodriguez. La Tarrancha optó por estrenalu nel formatu videoclip pol so calter cinematográficu. El trabayu audiovisual de grabación y edición fízolo’l fotógrafu, videocreador y tamién músicu Alejandro Viña, de 312 Films. El guión corrió a cuenta del cantante de la banda, Delfín Valdés, y foi codirixíu por dambos. Ye, a la fin «una pequeña hestoria en clave d’humor qu’escuende otres hestories y guiños, polo que paga la pena velu delles veces», aseguren. Dellos llugares de Siero, Llengréu, Bimenes y Piloña son los escenarios del videu.
La celebración de los venti años del grupu -materializada nel discu en directo Camín de Venti– foi’l motivu de la composición del cantar, que fai alusión a parte de los munchos festivales y llugares polos que pasó La Tarrancha, «dende’l Ebro hasta’l Nalón, dende’l Nervión hasta’l Sil», como diz la lletra. El tema fai, amás, xuegos de pallabres y emplega dobles sentíos con festivales de Galicia, Castilla, Euskadi, Cantabria, Llión y dalgunos de los d’Asturies. «Pela carretera» «convida a baillar y a siguir arrimándose a los conciertos», proclamen. Una mirada folixera y humorística a les sos dos décades de música en directo y viaxes.
Suscríbite a les nuestres novedaes
