«L’Ablugada fala del duelu, ye una hestoria con protagonistes con nome y apellíos»

Falamos con Lïbre del XVII Premiu Camaretá al Meyor Cantar que se celebra esti vienres y nel que son finalistes con 'L'Ablugada'

Entrevistes

Esti vienres 7 de payares a les 19h tien llugar nel Teatru Vital Aza de La Pola L.lena la gala final del XVII Premiu Camaretá al Meyor Cantar, l’únicu premiu institucional qu’esiste anguaño pa da-y reconocimientu a la música contemporánea fecha n’asturianu o gallego-asturianu. Lïbre con ‘L’ablugada‘, Herbamora con ‘Eclipse total‘, Ferla Megía con ‘Xatu‘ y Héctor Braga con ‘Valiente‘, son los cuatro proyectos y cantares nominaos nesta edición. Dende MUSICASTURIANA.COM vamos falar esta selmana cada día con ún de los artistes nominaos p’afondar na so participación nel gallardón.

Entamamos el cuestionariu con Lïbre, un proyectu musical que naz nel 2012. Empiecen tocando versiones acústiques de rock y rematen nel discu Ciudadano Cero. Depués d’un parón participen nel proyectu El mio cantar (2019), lo que supón un puntu d’inflexón pal grupu con un conceptu más averáu al rock. Nel 2025 publiquen l’EP Ciudadano lunar, con seis cantares que van de la canción d’autor al pop alternativu, dos d’elles escrites n’asturianu, mostrando’l compromisu de la banda pa con una de les llingües propies d’Asturies. Anguaño, Lïbre ta integrada por Falu (voz), Carlos y Óscar (guitarres), Michi (baxu) y David (batería).

¿Qué supón pa vós la nominación nesti premiu y qué supondría ganalu?

Cuando nos enteramos de la nominación tábemos que nun tocábemos tierra. Pa nós ye un arguyu, presta que’l trabayu que facemos tenga esti reconocimientu, y yá ganar el premiu sedría un emburrión pa siguir creando y que LÏBRE siga medrando.

¿Por qué escoyistis esti cantar pa concursar?

⁠Escoyimos L’Ablugada porque ye una canción mui especial pa nós. Ye cantar que ñació de cuatro acordes y una melodía, y que cuando la “vistimos” quiximos caltener esa esencia, que sonara como una canción piquiñina, con pocos elementos, pa que l’atención se centrara na melodía y nel testu. Un patrón rítmicu constante nel que van apaeciendo otros elementos hasta llegar al estribillu, que se vacía cuasi por completu. A la fin, la canción ruempe, coincidiendo cola referencia llírica a la batalla que llibra cada persona. L’Ablugada fala del duelu, ye una hestoria con protagonistes con nome y apellíos, que puede tener otres llectures dende’l puntu de vista de la pérdiga.

¿Tenéis daqué especial preparao pa l’actuación del domingu?

Tocar na gala, nun teatru, nun ye dalgo a lo que temos avezaos. Asina que llevar la nuesa propuesta a esi formatu yá va ser bien especial. Lo más importante pa nós ye que tamos bien conectaos como banda y como persones, y esa ye la base pa que pase lo guapo: que tolo técnicu acompañe y nos permita treslladar el filu emocional al públicu y crear esi pequeñu ritual máxicu que se da nos conciertos, anque esta vez vaya durar unos minutinos namás.