L’Infiestu va volver a ser, del 11 al 13 de setiembre, un puntu de referencia pa tolos siguidores de la música tradicional y de los vigulinos cola celebración de la sesta edición de les Xornaes del Vigulín Tradicional. La cita va xuntar durante trés díes formación, música en directo y espacios d’alcuentru, con una programación que pon el focu nel aprendizaxe, la tresmisión y la difusión del repertoriu tradicional del vigulín.
Les actividaes van entamar el vienres 11 de setiembre, a les 19.30h na Casa la Cultura, cola presentación de les Xornaes y un homenaxe a Antonio Espina, vigulineru tradicional del conceyu Piloña. A les 20.30h va celebrase’l conciertu de l’artista irlandesa Sorcha Costello, y la xornada remata a les 22h na Cervecería La Traviesa cola tradicional sesión vigulinera.
El sábadu 12, el Centru de Formación El Prial va acoyer, ente les 11h y les 19.30h , los cursos de vigulín, que van tar organizaos en trés niveles y con un profesoráu formáu por cinco destacaos músicos. Pela nueche vuelven los conciertos con La Bandina’l Tombo, un grupu «de cultu» dientro de la música tradicional del qu’hai mui poques oportunidaes de velos en directo. Actúen a les 22h en La Traviesa, onde una hora dempués celébrase una sesión vigulinera nueva. Les xornaes van continuar el domingu 13 con un cursu de vigulín pal baille, ente les 11 y les 13h n’El Prial, y darréu ponse’l ramu al eventu col alcuentru vigulineru
Una de les propuestes centrales d’estes Xornaes del Vigulín Tradicional son los cursos, que tán encadarmaos en trés niveles pa facilitar tanto’l primer acercamientu al instrumentu como’l perfeccionamientu de la técnica y el repertoriu. El Nivel 0 ta pensáu pa la xente que quiera facer per primer vegada un averamientu al vigulín. Va impartilu Celia Nieto, va tener una duración d’una hora y va ser gratuitu y ensin necesidá d’inscripción previa.
El Nivel 1 ta destináu a persones que yá tengan cierta soltura tocando’l vigulín, pero que tovía dependen d’un ritmu marcáu. El Nivel 2, pela so parte, ta pensáu pa intérpretes con mayor esperiencia, que toquen con soltura, deprendieren de memoria y conozan diferentes técniques y estilos. Amás, el programa formativu va cuntar con un taller específicu de repertoriu de vigulín pal baille, de la mano de Santi Galguera y Rubén Bada. Estos trés cursos van tener una duración de seis hores y una matrícula de 70 euros, que yá ta abierta inscribiéndose unviando un corréu a xornaesvigulin@gmail.com, indicando nome, nivel y teléfonu, y xuntando’l xustificante del pagu.
Los cursos d’estes Xornaes del Vigulín Tradicional van cuntar con un profesoráu con una amplia trayectoria dientro del vigulín y de la música tradicional. Dolfu R. Fernández ye ún de los nomes destacaos na evolución del vigulín n’Asturies. Miembru de grupos de folk como DRD y de formaciones como La Bandina’l Tombo, cunta con una llarga trayectoria alredor de la música asturiana y ye habitual nes sesiones y nueches de danza.
Dende Irlanda va aportar Sorcha Costello, intérprete con un estilu venceyáu a les referencies tradicionales, pero caracterizáu pola so forma llimpia y directa de tocar. En 2021 recibió’l Gradam Ceoil TG4 a meyor música moza del añu. La so actividá compaxina los escenarios cola docencia, con alumnáu tanto n’Irlanda como fuera del país.
Celia Nieto ye otra de les instrumentistes con mayor actividá de la escena asturiana actual. Venceyada a formaciones y proyectos como Corquiéu, Draque, La Ciudá Nel Mar o Mediaoreya, ye una referencia pa les xeneraciones más moces y una de les poques profesores de vigulín folk y tradicional n’activo n’Asturies.
El profesoráu vigulineru complétalu Rubén Bada, ún de los músicos con mayor proyección internacional de la escena y con una amplia trayectoria dientro d’Asturies. Participa en numberosos proyectos nos que trabaya col vigulín, la guitarra o’l bouzouki, y destaca tamién pola so faceta como constructor d’instrumentos.
Pela so parte, Santi Galguera ye músicu y etnomusicólogu y ún de los grandes conocedores del baile y la música tradicional asturiana. Tocó en diferentes formaciones de folk y música tradicional y ye director del Grupu Etnográficu L’Oriente. Toos ellos dan forma a esti eventu únicu nel calendariu asturianu que dende hai cinco años vien puxando pola tradición del vigulín nel país.
Suscríbite a les nuestres novedaes
