Otru añu más Xixón acueye Ente Fueyes, Ochobre Lliterariu, ciclu de lliteratura, artes escéniques y música qu’entama la Oficina de Normalización Llingüística de Xixón y la FMECyUP del Conceyu. La sesta edición va durar del 11 al 27 d’ochobre y nella hai presentaciones lliteraries, cuentacuentos, talleres pa la reciella, mercáu artesanu y dos actividaes rellacionaes cola música’l país: el conciertu de Vérsica y la interpretación del espectáculu del Grupu de Baille Tradicional San Félix Llamando a Conceyu.
La programación de música n’asturianu entama’l xueves 15 d’ochobre a les 19.30h nel patiu del Centru de Cultura Antiguu Institutu, col conciertu de Vérsica. Esti ye un proyeutu escénicu que tresforma la lliteratura asturiana nuna esperiencia actual onde música, imaxe y pallabra dialoguen nun mesmu escenariu. A partir de testos d’autores de muncha sonadía de la lliteratura asturiana, el grupu crea un universu sonoru y visual propiu que convida al públicu a redescubrir el nuestru patrimoniu lliterariu dende la emoción y la sensibilidá de güei. Lloñe del recital convencional o del conciertu al usu, cada actuación de Vérsica ye un percorríu inmersivu pela memoria, el paisaxe y la identidá d’Asturies. La fuercia de la música en directo, la creación audiovisual y la interpretación convierten cada obra nuna esperiencia compartida qu’axunta tradición y contemporaneidá.
Per otru llau, el sábadu 24 d’ochobre a les 12.30h na Plaza’l Marqués el Grupu de Baille Tradicional San Félix va interpretar el so espectáculu Llamando a conceyu. Esta obra quier dar un pasu alantre na renovación de la conxunción música y baille tradicional, creando un conceptu nuevu de pasucáis que, acompañáu de la pallabra, avéralu al teatru de cai. Nél suena música de dellos estilos sofitada nos sones tradicionales y baille entá más averáu a la tradición, pero intentando amosar muncho más.
En cuantes al testu, la obra fala de los conceyos abiertos, que tuvieron un papel cimeru na organización social de los pueblos, y qu’entá se caltién en dellos llugares d’Asturies. Ye una pallabra actual y flexible, que cambia d’un llugar de representación a otru, averándose a la historia, la cultura y la realidá d’esi llugar, de Xixón nesta ocasión.
Llamando a conceyu ye un espectáculu creáu a comuña ente xente mui destacao de la cultura asturiana. La idea orixinal ye de Xurde Fernández, autor de noveles, llibros de cuentos, poemarios y obres de teatru n’asturianu; la creación musical ye de Javi Tejedor, ún de los músicos más pernomaos de la escena folk; l’actuación ye de Raquel Prendes, actriz formada n’Asturies, Madrid, La Habana y Buenos Aires; la versión del llibretu ye de la escritora y profesora Iris Díaz Trancho; los y les baillarinos son el GBT San Félix; y los músicos d’estudiu foron Javier Tejedor, Rubén Bada, Sergio Rodríguez, Kike Dembinsky, Pepín de Muñalén, Silvia Quesada, Eva Tejedor y Marisa Valle Roso. Ye, poro, la del 24 d’ochobre, una oportunidá pa ver en Xixón ún de los espectáculos de cai más destacaos de la escena musical asturiana.
Suscríbite a les nuestres novedaes
