El míticu grupu de rock de Cangues d’Onís, Mala Reputación, sigue dando novedaes en rellación a la so xira despidida. Tres d’anunciar los dos conciertos últimos que van dar -26 y 27 de payares del añu qu’entra nos Kuivi Almacenes d’Uviéu, con toles entraes yá vendíes-, la selmana pasada desvelaron ónde entama’l so últimu tour. Va ser en casa, nel Oriente d’Asturies, na AMC Pepe Bocanegra de Piloña y van facelo acompañaos tamién de xente de casa: Skama la Rede. Esta fiesta del rock asturianu celébrase’l 16 de xineru con toles entraes agotaes en mui poques hores.
En 1997 cuatro collacios de Cangues d’Onís xuntáronse pa crear un grupu de punk-rock nomáu Mala Reputación. D’entós pacá pasaron 29 años y esi mesmu grupu de cuatro collacios convirtióse nuna de les formaciones más veteranes y reconocíes a nivel estatal del rock fechu n’Asturies. Tres cuasi trés décades esta historia tien puntu y final colos dos últimos conciertos que van dar l’añu qu’entra. Mentanto, van tar toa esta temporada tocando en dellos festivales de tol Estáu.
Mala Reputación tienen 10 trabayos publicaos que destaquen pola so evolución y madurez; dende unos entamos más punk-rock, hasta facer anguaño un rock posáu, cuidáu y con muncha personalidá propia; esi carácter que fai d’esti cuartetu una formación única dientro de la escena rockera asturiana y estatal.
Anque canten mayoritariamente en castellanu, el grupu siempre amosó’l so compromisu cola llingua asturiana nes sos intervenciones públiques y en redes sociales. Dientro del so repertoriu n’asturianu destaquen himnos como ‘Sin Atadures’, ‘Raigaños’ o ‘Fálame’ y con ellos collaboraron músicos de la escena de música n’asturianu como Xune Elipe de Dixebra, Corquiéu o Skama la Rede.



