Yá ta en YouTube’l videoclip de ‘La Carbonera’, el cuartu adelantu del nuevu discu de Marisa Valle Roso. Esta obra audiovisual ye un homenaxe a toles muyeres mineres; amás d’incorporar la lletra, ta fechu con semeyes que l’artista recoyó a traviés d’un formulariu, pidiendo al públicu que-y ficiesen llegar les hestories, los nomes y les imáxenes que aún conservaren. El resultáu nun ye solo un videoclip colectivu y sentíu con un importante mensax reivindicativu, sinón que tamién supón un archivu que rema escontra la sombra l’olvidu. Los nomes de les protagonistes quedaron tamién rexistraos na descripción del videu, y la artista ya anunciara va unes selmanes que too esi material diba tar disponible tamién na so páxina web, onde pretende crear un archivu vivu dedicáu a les muyeres que-y inspiraron pa facer esti cantar, que fila cola temática de los anteriores adelantos: ‘El tren de la Libertad’ y ‘Cenicientes del Carbón’.
Nesti sen, la cantante publica tamién un agradecimientu a toes eses persones que foron parte fundamental del pasáu d’Asturies y que agora siguen vives na memoria colectiva:
«A toles muyeres que trabayaron nes mines: gracies por ser lluz ente tanta escuridá, gracies por ser un encontu fundamental tanto dientro como fuera de la mina. L’alma de cada casa, la cura pa cada mancadura, la mano que trabayaba y nun se reconocía. Elles tamién tuvieron ellí.”
Suscríbite a les nuestres novedaes
