El sábadu 8 de febreru en Lata de Zinc (Uviéu) va celebrase’l III Semando Fest, festival de música moza n’asturianu qu’entamen Musicasturiana.com y Ixuxú Cultura. Nél van participar cuatro proyectos d’estremaos estilos musicales cola característica común de que la mayoría de los sos componentes son menores de 35 años. Alienda van ufrir un conciertu de power folk nel que van amosar la so esperiencia y solidez como intérpretes con temes enérxicos, reivindicando la riqueza de la cultura asturiana. Con ellos siguimos cola serie d’entrevistes dedicaes a afondar nes propuestes que van sonar nesta edición del Semando Fest con reflexones, amás, sobre la situación de la música moza del país anguaño.
La vuestra primer actuación d’esti añu ye nel Semando Fest, pero vais poder tocar nel Festival Intercélticu de Lorient esti branu. ¿Qué significa pa vós tornar dempués d’una década?
Pa nós ye una allegría pergrande y fainos especial ilusión porque l’anterior vegada que tuvimos tocando ellí foi en 2015, fai xusto 10 años, nos que’l grupu evolucionó muncho a nivel personal y musical, con un discu embaxo’l brazu. Tenemos munches ganes de tornar a Lorient y amosar tol material nuevu y esta versión más madura, pero coles mesmes ganes de los entamos d’Alienda.
«Dende los entamos del grupu una de les coses que mos propunximos yera tener un soníu cañeru. Damos-y muncha importancia al direutu y queríemos que la nuesa puesta n’escena fuera potente»
Entamastis con Alienda siendo xente mui mozo y asoleyastis el vuestru primer EP nel 2014. Sicasí, una de les característiques que más destaquen no que facéis yá dende esi trabayu ye la vuestra solidez como intérpretes y músicos, ¿ye esi ún de los pegoyos p’algamar un soníu enérxicu como’l vuestru?
Munches gracies. Yá dende los entamos del grupu una de les coses que mos propunximos yera tener un soníu cañeru, lo que se ve na instrumentación qu’escoyimos, usando batería y baxu, que nun apaecen davezu nel folk. Damos-y muncha importancia al direutu y queríemos que la nuesa puesta n’escena fuera potente, polo qu’enfocamos el nuesu llabor como grupu y como intérpretes nesa direición.
Tocáis y componéis mesmo temes instrumentales que cantares con lletra, ¿cómo ye’l procesu de creación en cada casu?
Préstanos trabayar a comuña, ye parte de la nuesa idiosincrasia como banda. Anque la idega d’una determinada melodía o tema seya d’una persona, queremos que tolos que formamos Alienda pongan el so granín d’arena na composición, yá seya nes armoníes, nos arreglos, nes estructures o na mesma instrumentación. Nel casu de los cantares, cuando vemos qu’una melodía ye afayadiza pa meter lletra, tenemos la suerte de tener cerca xente tan talentosa como Roberto González-Quevedo, que podría considerase’l nuesu lletrista oficial, o Alfredo González, quien tamién mos apurrió una lletra pa un cantar.
«Préstanos trabayar a comuña, ye parte de la nuesa idiosincrasia como banda. Queremos que tolos que formamos Alienda pongan el so granín d’arena na composición»
¿Cómo veis el relevu xeneracional na música asturiana?
Con fuercia y ganes, cosa que merez munchu reconocimientu. Nunca foi fácil facer música, cultura n’asturianu, y nel momentu que vivimos, nel que paez que la corriente imperante vien a desfacer tolos llogros y drechos ganaos, ver y sentir tolos grupos y formaciones moces que siguen surdiendo -munches vegaes esplorando nuevos xéneros y amiestos- presta y da arguyu de país. Dexa claro lo potente que ye la cultura asturiana y cómo la xente n’Asturies quier y consume productu asturianu y n’asturianu. Por muncho que s’empeñen y faigan tolo posible por dexamos suchos, somos asturianos y Asturies resiste.
«La xente n’Asturies quier y consume productu asturianu y n’asturianu. Por muncho que s’empeñen y faigan tolo posible por dexamos suchos, somos asturianos y Asturies resiste»
¿Qué dificultaes topastis como grupu mozu pa entamar y afitavos na escena?
La propia realidá socioeconómica del país. Entamamos el grupu siendo xente mui mozo, la mayoría tábemos estudiando entá. El problema de la emigración forciada españónos na cara cuando acabamos los estudios y tábemos entamando a afitanos na escena. De les seis persones qu’anguaño formamos el grupu, la metá tuvimos emigraos en dalgún momentu -de fechu ún inda sigue ensin poder tornar p’Asturies-, y dellos otros dexaron el grupu al colar a trabayar o estudiar fuera. Ye mui complicao caltener un grupu neses circunstancies, polo que tuvimos ensin actividá un par d’años hasta que conseguimos retomar.
«El problema de la emigración forciada españónos na cara cuando acabamos los estudios y tábemos entamando a afitanos na escena»
¿Qué aporta la vuestra propuesta a la escena moza?
Préstanos creyer que caltenemos un poco la esencia del folk asturianu, del que mos consideramos deldores, pero que tamién tenemos aportao característiques propies y un estilu y soníu personal que podríen considerase «marca Alienda». El fechu de que toos tengamos gustos diferentes fai que tengamos una mecigaya d’influencies, qu’anque seyan distintes, conseguimos afayar mui bien unes con otres.
¿Faen falta más proyectos de música moza n’Asturies? ¿Qué formatu-yos daríeis?
Na nuesa opinión faen falta munchos más espacios onde poder actuar, yá seya en llocales, festivales o conciertos. N’Asturies hai una bayura musical importante pal tamañu que tien, pero ye complicao atopar espacios onde tocar o qu’apuesten por grupos llariegos. Anguaño hai dellos macrofestivales n’Asturies onde la presencia de grupos mozos asturianos ye mínima. Lo más importante pa un grupu novel ye actuar. Paeznos necesario xenerar un circuitu de conciertos que puedan atrayer públicu y onde puedan actuar grupos mozos y grupos que yá nun somos tan mozos pero que tamién tenemos ganes de tocar.
«Faen falta munchos más espacios onde poder actuar. Anguaño hai n’Asturies dellos macrofestivales onde la presencia de grupos mozos asturianos ye mínima»
¿Qué otros grupos mozos d’anguaño o d’antaño vos inspiraron?
Préstennos muncho grupos asturianos de finales de los 90 y entamos de los 2000 como N’Arba o Xéliba, que tamién entamaron mui mozos. Anguaño, compartimos dalgún miembru con Abéu, que tamién ye una banda moza y qu’encamentamos muncho a sentir. Tamién mos presten otres propuestes de fuera d’Asturies como Talisk o Rura, qu’anque yá nun son tan moces, sí lo yeren de la qu’entamaron.
N’Asturies, anque poca por dellos motivos y, ente ellos, la emigración, hai música moza, pero munches propuestes nun escueyen l’asturianu nes sos composiciones, ¿por qué pensáis que ye?
L’asturianu na música tuvo munchu tiempu arrequexáu nel folk, na música tradicional, y nel rock y el punk más combativu y venceyáu al asturianismu. Toos estos estilos caltuvieron l’usu del asturianu de forma militante, siendo una de les sos señes d’identidá, y hai muncho qu’agradece-yos. N’otros estilos como’l rap o l’indie, anque hebo delles propuestes mui meritories, el fechu de que muncha xente venceye esos tipos de música a llingües como’l castellán o l’inglés, sumao a la poca visibilización y la estigmatización del asturianu que se fai dende les instituciones publiques, fai que la propuesta musical -mesmo moza qu’adulta- en llingua asturiana nun seya tolo variada que debiera. Poro, faen falta polítiques de visibilización y normalización del asturianu pa torgar esta situación. Ye necesaria la oficialidá pa ponenos al mesmu nivel que llingües como’l catalán, el gallegu o l’euskera, que s’empleguen en tou tipu d’estilos musicales con normalidá.
«L’asturianu tuvo munchu tiempu arrequexáu nel folk, na música tradicional, y nel rock y el punk más combativu y venceyáu al asturianismu. Caltuvieron el so usu y hai muncho qu’agradece-yos»
Yá p’acabar, ¿qué podéis avanzanos del vuestru conciertu nel Semando Fest?
Facía tiempu que nun tocabemos n’Uviéu y tenemos-y munchu ciñu. Foi’l nuesu puntu d’alcuentru como grupu munchos años na nuesa etapa universitaria, na que quedábemos peles tardes pa ensayar. El prósimu 8 de febreru vamos facer un percorríu pola nuesa música, ya invitavos a acompañamos por esa evolución musical, qu’entama n’Uviéu, hasta facevos despegar el zapatu del suelu. Vamos con ganes de tresmitir y facer que lo paséis bien.
Suscríbite a les nuestres novedaes
