El festival Xixón Folk yá ta preparando la so segunda edición dempués del ésitu algamáu en setiembre de 2024. Los díes 6, 7 y 8 de xunu, el Parque Fluvial del barriu de Viesques va volver acoyer esta iniciativa qu’entama la Banda Gaites Saxum con una montonera conciertos, actividaes y collaboradores.
Diego Lobo, director de la banda, cuenta que decidieron crear el Xixón Folk «pola motivación de tener un espaciu propiu pa poder participar nel circuitu d’intercambios qu’hai pel movimientu de les bandes de gaites y, amás, pola inquietú de los mozos y moces de la banda, a los que-yos paecía interesante tar na organización d’un eventu qu’amestara la cultura tradicional y el nuevu folk». Los sos oxetivos pa la primer edición yeren situase nel mapa de festivales asturianos col presupuestu del que disponíen que, diz «nun yera muncho», polo que tola xente de la banda tuvo qu’implicase pa recaldar los fondos que necesitaben y poder llevantar la propuesta, picando a la puerta de posibles patrocinadores y instituciones como’l Conceyu de Xixón, «con tol papeléu que conlleva».
Saxum faen un balance perbonu de la esperiencia, apuntando tamién dellos detallinos p’ameyorar nos que yá entamaron a trabayar n’ochobre. Esta segunda edición que va celebrase en xunu de 2025 va siguir na mesma llinia, pero van apostar por mover delles actividaes destacaes a horarios diurnos pa poder competir cola bayura d’ufierta cultural qu’hai en Xixón y, asina, adaptales a tolos públicos. Amás, quieren aprovechar tol espaciu pa que la música y l’actividá nun apare, aumentando la presencia de talleres y puestos nel mercáu. Van caltener l’alcuentru de bandes de gaites nel que participen formaciones asturianes y d’otro territorios, la nueche en danza, los conciertos de grupos folk del sábadu, la sesión vermú y les actuaciones de grupos de baille nel escenariu. «Va ser una edición potente», conclúi Lobo.
Semeya de portada de Lucía Garó.
Suscríbite a les nuestres novedaes
